Shimoliy Koreya Janubiy Koreya chegarasi orqali chiqindi ortilgan 150 dan ortiq havo sharlari uchirdi. Bu haqda Seul shtab boshliqlari birlashgan qo‘mitasiga tayanib, Yonhap xabar berdi.
Ma’lum qilinishicha, sharlar 28-may kuni kechqurun chegarani kesib o‘ta boshlagan va mamlakatning turli joylariga tushib, janubi-sharqiy Kyonsan provinsiyasigacha yetib kelgan. Sharlar ichida turli xil chiqindilar, masalan, plastik butilkalar, batareyalar, poyabzal qismlari va hatto go‘ng ham bor. Ular batafsil tahlil qilish uchun yig‘ib olingan.
“Shimoliy Koreyaning bu harakatlari xalqaro huquqni ochiqdan-ochiq buzadi va xalqimiz xavfsizligiga jiddiy tahdid soladi, biz KXDRni o‘zining g‘ayriinsoniy harakatlarini zudlik bilan to‘xtatishga chaqiramiz”, — deyiladi Janubiy Koreya birlashgan shtab boshliqlari bayonotida.
Mart oyi oxirida Yonhap agentligi Janubiy Koreya harbiylari Shimoliy Koreyani kuzatish uchun 2030-yilgacha 60 ga yaqin ayg‘oqchi sun’iy yo‘ldoshni uchirish niyatida ekanini yozgandi. Gap 10-20 ta kichik va taxminan 40 ta mikro sun’iy yo‘ldosh haqida ketmoqda.
2023-yil noyabrida Shimoliy Koreya o‘zining birinchi harbiy josus sun’iy yo‘ldoshini muvaffaqiyatli uchirganini e’lon qildi, u AQSH va Guam orolidagi Amerika harbiy bazalari suratlarini uzatgani ta’kidlandi. AQSH Moliya vazirligi bunga javoban Kimsuki tashkiloti va KXDRning mamlakatdan tashqarida yashovchi sakkiz nafar fuqarosiga qarshi sanksiyalar kiritdi.
Izoh (0)