O‘zbekistonlik yosh muhandislar tomonidan yig‘ilishi rejalashtirilgan ilmiy texnologik sun’iy yo‘ldosh SpaceX raketasida uchirilishi mumkin. Bu haqda “O‘zbekkosmos” agentligi matbuot xizmati xabar berdi.
Ma’lum qilinishicha, O‘zbekiston iqtisodiyotini yanada rivojlantirishda kosmik texnologiyalardan foydalanish va bu borada ilg‘or xorijiy tajribani o‘rganish maqsadida agentlik delegatsiyasi AQSHning bir necha hududlarida, xususan, SpaceX kompaniyasining Los Anjelesdagi ofisida bo‘ldi.
Uchrashuvda o‘zbekistonlik yosh muhandislar tomonidan Yaponiyaning Kyushu texnologiya institutida o‘qish davomida yig‘ilishi rejalashtirilgan ilmiy texnologik sun’iy yo‘ldoshni SpaceX kompaniyasining raketasida uchirish masalasi muhokama qilindi.
Shuningdek, O‘zbekistoning “Kosmik tadqiqotlar va texnologiyalar — 2035” strategiyasi bo‘yicha fikr almashilib, SpaceX kompaniyasi vakillari hujjatning dastlabki loyihasi tayyor bo‘lgach, uni ko‘rib chiqib, yanada takomillashtirish bo‘yicha fikr va mulohazalarini taqdim etishga tayyor ekanliklarini bildirishdi.
Delegatsiya a’zolari SpaceX kompaniyasining Falcon 9 tashuvchi raketasini ishlab chiqarish jarayonlari va quvvatlari bilan yaqindan tanishdi.
Bundan tashqari, delegatsiya a’zolari AQSHning Kolorado Springs shahri mezbonlik qilgan Space Symposium xalqaro konferensiyasida ham ishtirok etishdi. Mazkur o‘zaro muloqot platformasi orqali turli mamlakatlarning kosmik texnologiyalar sohasida faoliyat yurituvchi kompaniyalari bilan muzokaralar o‘tkazildi.
Xususan, kosmik sanoat mahsulotlarini ishlab chiqaruvchi kompaniyalar bilan quvvatlarining bir qismini O‘zbekistonga ko‘chirish masalalari bo‘yicha dastlabki fikrlar almashildi. Shuningdek, Uzcosmos agentligi mutaxassislari tomonidan ishlab chiqilayotgan, sun’iy yo‘ldoshlarni harakatlantiruvchi tizimlarni (satellite propulsion system) loyihalash, ishlab chiqish, sinovdan o‘tkazish va tijoratlashtirish bo‘yicha mavjud yondashuvlar, texnologiyalar va hamkorlik imkoniyatlari muhokama qilindi.
Konferensiya doirasida agentlik vakillari bir qator uchrashuvlarni o‘tkazib, manfaatli kelishuvlarga ham erishdi. Xususan, “O‘zbekkosmos” agentligi va Koreya Aerokosmik Administratsiyasi (KASA) o‘rtasida anglashuv memorandumi imzolandi.
Unga ko‘ra, o‘zaro hamkorlikni kosmik ta’lim, fanlar va tadqiqotlar, kosmik texnologiyalarning qo‘llanilishi, sun’iy yo‘ldoshlar ishlab chiqish, yerusti kosmik infratuzilmasini yaratish va rivojlantirish kabi yo‘nalishlarda olib borish belgilandi. “Kosmik tadqiqotlar va texnologiyalar — 2035” strategiyasini amalga oshirishda Fransiyaning Novaspace konsalting kompaniyasi bilan konsultativ hamkorlik qilish bo‘yicha ham ikki tomonlama kelishuvga erishildi.
2022-yilda SpaceX kompaniyasi O‘zbekistonda yirik loyihalar amalga oshirishga tayyor ekanini bildirgandi.
Izoh (0)