Shimoliy Koreyaning josuslik sun’iy yo‘ldoshi uchirilganidan bir yarim hafta o‘tgach, Janubiy Koreya ham o‘zining birinchi harbiy razvedka sun’iy yo‘ldoshini koinotga yubordi. Bu haqda 2-dekabr kuni AFP xabar berdi.
Apparat Amerikaning SpaceX aerokosmik kompaniyasining Falcon 9 raketa tashuvchisi yordamida Kaliforniya shtatidagi Vandenberg kosmik markazidan havoga ko‘tarildi. Janubiy Koreya mazkur sun’iy yo‘ldoshdan yadro quroliga ega Shimoliy Koreya faoliyatini kuzatishda foydalanmoqchi.
Janubiy Koreyaning ayg‘oqchi sun’iy yo‘ldoshi Yer atrofida 400-600 kilometr balandlikda aylanib chiqadi va o‘lchami 30 santimetrgacha bo‘lgan narsalarni aniqlay oladi. Janubiy Koreya Mudofaa vazirligi bayonotida mamlakat sun’iy yo‘ldosh texnologiyalari sohasida dunyodagi eng ilg‘or beshta davlatdan biri ekanini ta’kidladi. 2025-yil oxirigacha Seul koinotga yana to‘rtta kuzatuv yo‘ldoshini uchirishni rejalashtirmoqda.
Pxenyan ikkita muvaffaqiyatsiz urinishdan so‘ng o‘z sun’iy yo‘ldoshini uchirdi
Janubiy Koreyaning Sandji universitetidan harbiy ekspert Choy Gi-Il AFP’ga bergan intervyusida shu paytgacha Janubiy Koreya AQSH tomonidan boshqariladigan josuslik sun’iy yo‘ldoshlariga tayanib kelganini aytdi. Seul avval orbitaga harbiy aloqa uchun zarur sun’iy yo‘ldoshlarni yuborgan. Biroq razvedka sun’iy yo‘ldoshlarini uchirish “murakkab texnologik to‘siqlar” tufayli uzoq vaqt olgan.
Shimoliy Koreya may va avgust oylarida o‘tkazilgan ikkita muvaffaqiyatsiz urinishlardan so‘ng noyabr oyida o‘z kuzatuv sun’iy yo‘ldoshini uchirdi.
Keyinroq Janubiy Koreya Shimoliy Koreya sun’iy yo‘ldoshi orbitaga muvaffaqiyatli uchirilganini tasdiqladi. Pxenyan maʼlumotlariga ko‘ra, ushbu qurilma allaqachon Oq uy va Vashingtondagi Pentagon, shuningdek, Amerika va Janubiy Koreya harbiy bazalarini batafsil suratga olgan.
Izoh (0)