Yaponiya uzoq yillar davomida urushga qarshi qat’iy siyosat yuritib kelgan. Biroq Sharqiy Osiyodagi xavfli vaziyatlar sabab mamlakat harbiy kuchlarini kuchaytirmoqda. Bu haqda Bild xabar berdi.
Mamlakat mudofaa kuchlari asta-sekin xalqaro vazifalarni bajarishga qodir armiyaga aylanishga intilmoqda.
Yaponiya uchta qo‘shni yadroviy davlat — Xitoy, Shimoliy Koreya va Rossiyadan tahdid sezmoqda. Bu borada Xitoy, shubhasiz, asosiy xavfsizlik muammosi hisoblanadi, deydi germaniyalik tahlilchi Aleksandra Sakaki.
Uning so‘zlariga ko‘ra, so‘nggi yillarda Yaponiya o‘z harbiy kuchlarini sezilarli darajada mustahkamlagan.
Yaponiya va Xitoy o‘rtasida Sharqiy Xitoy dengizida hududiy nizo bor, bu esa istalgan paytda kuchayishi mumkin. Tokioni Tayvan atrofidagi vaziyat ham xavotirga solmoqda. Chunki Tayvan eng yaqin yapon orolidan atigi 110 kilometr uzoqlikda joylashgan, deya ta’kidladi Sakaki.
AQSH bilan ittifoqlik Yaponiya uchun strategik jihatdan birinchi darajali ahamiyatga ega. Yaponiyada taxminan 50 ming nafar amerikalik harbiy xizmatchi joylashtirilgan. Bu boshqa har qanday mamlakatdagidan ko‘proqdir.
Yaponiya 2026-yildan boshlab Kyushu oroliga raketalarni, Yonaguni oroliga havo hujumidan mudofaa tizimlarini joylashtirmoqchi. Tayvanga yaqin joylashgan Sakishima orollaridan 110 mingdan ortiq odamni evakuatsiya qilish rejalashtirilgan.
Izoh (0)