O‘zbekiston tashqi ishlar vazirining o‘rinbosari Olimjon Abdullayev kecha Janubiy Koreya elchisi Von Do Yon bilan uchrashuv o‘tkazdi. Bu haqda “Dunyo” AA xabar berdi.
TIV maʼlumotiga ko‘ra, muzokaralar chog‘ida mehnat migratsiyasi va O‘zbekiston fuqarolari uchun viza tartib-taomillarini soddalashtirish sohasidagi ikki tomonlama hamkorlikning asosiy jihatlari muhokama qilindi.
Kun tartibidagi asosiy mavzular Janubiy Koreya mehnat bozori uchun yuqori malakali mutaxassislarni tayyorlash, shuningdek, qo‘shma o‘quv dasturlarini ishlab chiqish va ishga jo‘nab ketishdan oldingi tayyorgarlik uchun yangi taʼlim tashabbuslarini yaratish masalalari bo‘ldi.
Viza talablarini soddalashtirish, shu jumladan o‘zbekistonlik mavsumiy ishchilar uchun qulay imkoniyatlar yaratishga alohida eʼtibor qaratildi.
Tomonlar Janubiy Koreyada mehnat qilayotgan O‘zbekiston fuqarolari uchun qulay shart-sharoitlar yaratish maqsadida ushbu yo‘nalishdagi ishlarni davom ettirishga kelishib oldi.
Janubiy Koreya tarixida ilk bor O‘zbekiston fuqarolariga Ulsan shahri meriyasi orqali soddalashtirilgan tartibda mehnat vizalarini berish mexanizmlari joriy etilishi haqida xabar berilgandi.
Izoh (0)