Shimoliy Koreya yetakchisining singlisi Kim Yo Chjon 9-aprel kuni Pxenyan o‘zini yadroviy davlat deb e’lon qilganini aytdi. U AQSHning yadroviy arsenalni yo‘q qilish haqidagi chaqiriqlarini “mantiqsiz” va “xomxayol” deb atadi. Bu haqda UPI xabar berdi.
Agar kimdir bizning oldimizda yadro qurolini yo‘q qilish haqida ochiqchasiga gapirsa yoki turli bahonalar bilan ‘yadro qurolsizlantirish’ degan allaqachon o‘lgan tushunchani tiriltirmoqchi bo‘lsa, bu KXDR suverenitetini inkor etishning eng dushmanona harakatidir, dedi Kim.
Pxenyanga qarshi hamkorlik
AQSH davlat kotibi Marko Rubio, Janubiy Koreya tashqi ishlar vaziri Cho Tae-yul va uning yaponiyalik hamkasbi Ivaya Takeshi NATO yig‘ilishi doirasida Bryusselda uchrashdi. Ular Shimoliy Koreyadan kelayotgan tahdidga qarshi uch tomonlama hamkorlik masalasini muhokama qildi.
Ittifoqchilar “KXDRning yadro va raketa dasturlariga birgalikda qarshi kurashish va unga qarshi qo‘yilgan sanksiyalar tizimini saqlab qolish hamda kuchaytirish zarurligini” aytdi.
Agar ular chin dildan ‘yadro qurolsizlantirish’ haqida bong urayotgan bo‘lishsa, bu mutlaqo mantiqsiz. KXDR yadro quroliga ega davlat sifatidagi maqomi oliy va asosiy davlat qonunida abadiy mustahkamlangan, dedi Kim Yo Chjon.
2022-yil sentabr oyida Shimoliy Koreya o‘zini rasmiy yadroviy davlat deb e’lon qilgan va o‘zini himoya qilish maqsadida zarurat tug‘ilganda yadro zarbasi berish huquqini qonunlashtirgan. KXDR rahbari Kim Chen In bu qarorni “qaytarib bo‘lmaydigan” deb atagan va konstitutsiyaga yadroviy arsenalni doimiy rivojlantirishga oid o‘zgartirishlar kiritgan.
AQSH bilan muzokaralar qayta boshlanishi mumkinmi?
AQSH prezidenti Donald Tramp Kim bilan yadro muzokaralarini tiklamoqchi degan taxminlar mavjud. Tramp birinchi prezidentlik davrida Shimoliy Koreya rahbari bilan uch bor uchrashgan. Biroq bu diplomatik sa’y-harakatlar yadro kelishuviga olib kelmagan. Pxenyan esa o‘z qurol dasturini jadallashtirgan. Tramp intervyularidan birida Kim Chen In bilan yaxshi aloqada ekanini aytgandi.
Chegaradagi ziddiyat
Trampning prezidentlikka qaytganidan beri Shimoliy Koreya qurol sinovlarini davom ettirmoqda. Jumladan, mart oyida AQSH va Janubiy Koreya qo‘shma harbiy mashg‘ulotlar o‘tkazganidan so‘ng Pxenyan yangi raketa tizimini sinovdan o‘tkazdi.
9-aprel kuni kechqurun Koreya yarim orolidagi harbiy chegarada ziddiyat yuz berdi. Taxminan o‘n nafar qurollangan Shimoliy Koreya askarlari demilitarizatsiya zonasi hududida harbiy chegara chizig‘ini qisqa vaqtga buzib o‘tdi. Janubiy Koreya harbiylari ogohlantiruvchi o‘q uzgach, shimoliy koreyaliklar darhol orqaga qaytgan.
Izoh (0)