Shimoliy Koreya Janubiy Koreya bilan harbiy keskinlikni pasaytirish bo‘yicha besh yillik kelishuvni uzib, chegarada kuchliroq qurolli kuchlar va yangi qurollarni joylashtirishini aytdi. Bu haqda Financial Times xabar berdi.
“Biz to‘xtatilgan barcha harbiy chora-tadbirlarni zudlik bilan qayta tiklaymiz”, — deyilgan KXDR bayonotida va “shimol va janub o‘rtasida konflikt yuzaga kelgan taqdirda “Koreya Respublikasi” deb ataluvchi davlat to‘liq javobgarlikni o‘z zimmasiga olishi” haqida ogohlantirilgan.
2018-yilda imzolangan Koreyalararo keng qamrovli harbiy kelishuv chegaradagi harbiy keskinlikni kamaytirishga qaratilgan.
Mavjud kelishuvga ko‘ra, davlatlar “bir-biriga qarshi barcha dushmanlik harakatlarini to‘liq to‘xtatish”ga va’da bergan va ishonchni mustahkamlash bo‘yicha bir qator chora-tadbirlarni, jumladan, Koreyalararo chegara yaqinida harbiy mashg‘ulotlar o‘tkazishni taqiqlash va o‘q otish mashqlarini cheklashni nazarda tutgan. Tomonlar, shuningdek, ayrim xavfsizlik postlarini olib tashlab, harbiy ishonch telefonini ishga tushirgan.
Ammo tahlilchilarga ko‘ra, kelishuv sun’iy yo‘ldosh uchirilishidan ancha oldin jiddiy taranglikda bo‘lgan. Seul bir necha bor Pxenyanni 2018-yilgi kelishuv shartlarini buzganlikda ayblagan va yuqori martabali amaldorlar uning maqsadlariga tobora ko‘proq shubha qilmoqda.
Shimoliy Koreya ayg‘oqchi sun’iy yo‘ldosh uchirdi
Shimoliy Koreya bortida ayg‘oqchi sun’iy yo‘ldoshi bo‘lgan ballistik raketani muvaffaqiyatli uchirdi. “Maligen-1” sun’iy yo‘ldoshi Sohe kosmodromidan “Chollima-1” raketasi yordamida uchirilgan. Raketa parvozi mahalliy vaqt bilan taxminan 22:43 da amalga oshgan. Raketa berilgan marshrut bo‘ylab normal uchib, 705 soniya o‘tib orbitaga ayg‘oqchi sun’iy yo‘ldoshni qo‘yib yuborgan. Jarayonni kosmodromdan Shimoliy Koreya yetakchisi Kim Chen In kuzatgan.
Izoh (0)