Shimoliy Koreyadan qochib ketgan ayol yopiq mamlakat maktablaridagi hayot qandayligini oshkor qildi. Ta’lim muassasasida bolalar og‘ir mehnat qilishga, kaltaklanishga va KXDR yetakchisi Kim Chen Innga sig‘inishga majburlanishi aytilmoqda. Bu haqda Mirror nashri xabar berdi.
Bella Seo hozirda 23 yoshda va Janubiy Koreyaning Seul shahrida istiqomat qiladi. U KXDR maktablarida bolalarning baholari uchun eng muhim fan Kimlar oilasini o‘rganish ekanini ta’kidladi. Mazkur fan uchun kuniga uchta dars ajratiladi, umumiy kunlik darslar soni esa odatda yettita.
Kim oilasining “Bolalik tarixi va inqilobiy tarixi” eng muhim fanlar hisoblanadi. O‘quvchi koreys tili, ingliz tili, matematika, tarix, tabiiy fanlar, jismoniy tarbiya yoki san’at fanlarini a’lo darajada bilsa ham, uning umumiy bahosi ushbu mafkuraviy fanlardan o‘zlashtirishiga bog‘liq, deydi koreyalik qochqin.
Har bir o‘quv kuni Kim sulolasi portretlarining changini tozalash va sadoqat qo‘shiqlarini kuylash marosimi bilan boshlanadi. Shanba kunlari esa qo‘shimcha o‘z-o‘zini tanqid qilish sessiyasi bo‘lib o‘tadi. Unda o‘quvchilar o‘zining g‘oyaviy kamchiliklarini tahlil qiladi.
Biroq ta’lim dasturi maktabdagi eng og‘ir qism emas edi, dedi ayol.
U darslar tugab, o‘quvchilar uyga ketishdan oldin yana uch-to‘rt soat davomida og‘ir jismoniy mehnat bilan shug‘ullanishga majbur bo‘lishini aytdi. Bella Seo o‘qigan maktabda o‘quvchilarga maktabning toshloq hovlisini qum bilan tekislash vazifasi yuklatilgan. Bu uzoq muddatli vazifa bo‘lib, ko‘p mehnatni talab qilgan.
Bu ko‘pincha har kuni maktabdan keyin uch-to‘rt soat davom etardi. Qum va toshlar bilan to‘ldirilgan 25 kilogrammlik qoplarni ko‘tarib yurishimga to‘g‘ri kelardi, bu juda qiyin edi, deb eslaydi u.
Ayolning so‘zlariga ko‘ra, bunday dars kunidan keyin u ko‘pincha ovqatlanishga ham quvvat topolmasdi, shu sababli uyga qaytgach, darhol uxlashga yotardi. Bella Seo ushbu loyiha uchun moliyaviy xarajatlar ham o‘quvchilar oilasining byudjetiga tushganini ta’kidladi.
Qish faslida o‘quvchilar darslar boshlanishidan oldin qor kuragan. Qor yog‘ishi natijasida o‘quv jarayoni odatda ikkinchi yoki hatto uchinchi darsdan so‘ng boshlangan. Shimoliy Koreya targ‘iboti mamlakatda maktab ta’limi bepul ekani bilan maqtanadi. Ammo ayolning so‘zlariga ko‘ra, ota-onalar zimmasiga tushadigan ko‘plab majburiy xarajatlar mavjud.
O‘quvchilar maktab tadbirlarining xarajatlarini o‘z hisoblaridan qoplashi lozim edi — hatto o‘qituvchilarning tug‘ilgan kunlari, to‘ylar va oilaviy bayramlar ham mablag‘ yig‘ishni talab qilardi. Sinf rahbarlari hammadan ko‘proq pul ajratardi. Bu kunlik ish haqi bilan kun kechiradigan oilalar uchun og‘ir yuk edi. To‘lovni amalga oshirolmagan o‘quvchilar, ko‘pincha sinfdoshlaridan ijtimoiy izolyatsiya yoki o‘qituvchilarning jismoniy jazolari bilan yuzlashardi, bu o‘qituvchining kayfiyati va shaxsiyatiga qarab farq qilardi, deydi Bella Seo.
Ta’kidlanishicha, KXDR maktab tizimi uchun bolalarga nisbatan jismoniy zo‘ravonlik oddiy hol hisoblanadi. Masalan, Bella Seoning dugonalaridan birini sinf rahbari darsdan keyin xonani tozalash paytida haddan tashqari shovqin qilgani uchun urgan.
Muallima uning sochidan ushlab, bir urdi va o‘qituvchi stoliga uloqtirdi. U yig‘lab, kechirim so‘radi. Keyinchalik uning ota-onasi maktabga tashrif buyurib, o‘qituvchidan uzr so‘radi, biroq hodisa jiddiy muammo sifatida ko‘rilmagan. Bu maktabda ko‘p uchraydigan zo‘ravonliklardan biri edi, xolos, dedi shimoliy koreyalik ayol.
U darslarda AQSH “doimiy dushman”, ular bilan birga yashash imkonsiz deb ta’riflanganini aytdi. Shu bilan birga, Janubiy Koreya “qashshoq va och qolgan” mamlakat sifatida tasvirlangani ma’lum qilindi.
Izoh (0)