Kosmetika, maktab, restoran: jahon estradasi yulduzlarining qo‘shiqchilikdan boshqa bizneslari

Shou-biznesdagi muvaffaqiyat chegara emas. Baʼzi xonandalar bundan ham ko‘proq narsaga erishadi. Ular biznes qurmoqda, fondlar tashkil qilmoqda va sahnadan tashqari o‘yin qoidalarini o‘zgartirmoqda. Biz xonandalarning karyerasini sahna, studiya va gastrollar bilan cheklashga odatlanib qolganmiz. Ammo ko‘plab yulduzlar ijodkorlik bu faqatgina ularning bir qirrasi ekanligini isbotladi. Quyida hitlar, gastrollar va ijodkorlikni biznes qobiliyati bilan uyg‘unlashtirgan xonandalarni ko‘rib chiqamiz.

Ariana Grande: atir va kosmetika

Amerikalik xonanda va aktrisa Ariana Grande 2015-yilda o‘zining ilk Air by Ariana Grande xushbo‘y atirini chiqardi va bu yangilik uning musiqiy imijining bir qismi bo‘ldi. Hozirgi kunda ham ishlab chiqarilayotgan har bir atiri uning yangi qo‘shiqlari bilan to‘ldirilib, reklama kampaniyalarining bir qismiga aylanadi. Uning atirlari butun dunyo bo‘ylab sotiladi.

Ariana atir biznesi bilan to‘xtamaslikka qaror qildi. 2021-yilda Ariana o‘zining R.E.M. Beauty go‘zallik brendini yaratdi. R.E.M. Kosmetika nomi “rapid eye movement” uyqu fazasi bo‘lib aynan shu vaqtda odam eng yorqin tushlarni ko‘radi. Xuddi shu nom Grande qo‘shiqlaridan biriga ham tegishlidir.

R.E.M. Beauty liniyasida universal mahsulotlar mavjud. Asosiy xususiyati shundaki, dekorativ vositalari go‘zallikni taʼkidlaydi va shu bilan birga teriga g‘amxo‘rlik qiladi. Brendning konsepti, reklamasi va hatto retro-fantastika uslubidagi qadoqlarini ham Ariana o‘zi yaratgan.

Musiqiy mashhurlik va go‘zallik brendi ajoyib tarzda birga yashaydi. Ariana hitlarni chiqarishda, filmlarda rol o‘ynashda va shu bilan birga, qo‘shiqlardan tortib qadoqlashgacha hamma narsa uning ovozi bilan gapiradigan imperiyani qurishda davom etmoqda.

Ledi Gaga: ekologik go‘zallik brendi va shaxsiy restoran

Ledi Gaga nafaqat kult qo‘shiqlarning muallifi, balki Joanne Trattoria oilaviy restoranining ham egasi hisoblanadi.

Joanne Trattoria restorani 2012-yilda ochilgan va o‘shandan beri italyan taomlari ixlosmandlarining qalbini zabt etib kelmoqda. Xonandaning aytishicha, restoranning asosiy afzalliklari juda mazali taomlar va g‘oyat yoqimli muhitda ekan. Hozirda restoranni uning ota-onasi boshqaradi, lekin xonanda tez-tez u yerga boradi va moliyaviy jihatdan qo‘llab-quvvatlaydi.

Restoran bu hammasi emas. 2012-yilda Ledi Gaga Born This Way nomli xayriya fondini ochdi, u yoshlarga ruhiy muammolar bilan kurashishda yordam beradi. Xonanda fond “yosh avlod sog‘lig‘ini qo‘llab-quvvatlash”, shuningdek “dunyoga jasorat va mehribonlik qo‘shish” uchun mavjudligini aytdi. Uning fikricha, har bir inson qiyin paytlarda qo‘llab-quvvatlaydigan kishiga ega bo‘lishi kerak: “Bu mening hayotimni saqlab qoldi va bu ularning ham hayotini saqlab qoladi” deydi u.

2019-yil sentyabr oyida esa pop timsoli “o‘zini ifoda etish orqali mehribonlik va jasoratni ulashish” maqsadida ekologik go‘zallik brendi — Haus Labsni yaratdi. Kosmetika odamlarning individualligini yashirmasdan, aksincha taʼkidlaydi. Gaga o‘z brendini odamlar bilan so‘zsiz gaplashish usuli deb atagani ajablanarli emas.

Ledi Gaga hamma sevgan ishlarini qamrab olgan: gastrollar, kino, biznes va ijtimoiy loyihalar. U buni birinchi konsertlarida bo‘lgani kabi shiddat bilan amalga oshiradi.

Hozirda Ledi Gaga gastrol, kino, biznes va ijtimoiy loyihalarni bir vaqtning o‘zida birlashtirib, ularning har biriga xuddi birinchi konsertlarida bo‘lgani kabi fidoyilik bilan yondashadi.

Selena Gomes: go‘zallik brendi va ruhiy ko‘mak fondi

Eng isteʼdodli tadbirkor qizlardan biri — amerikalik qo‘shiqchi va aktrisa Selena Gomes 2020-yilda tashqi va ichki g‘amxo‘rlikni birlashtiruvchi Rare Beauty kosmetika brendini va Rare Impact Fund ruhiy ko‘mak fondini yaratdi.

Atigi 4 yil ichida Rare Beauty Time jurnalining eng nufuzli kompaniyalar ro‘yxatiga kirdi. Jurnalda taʼkidlanishicha, brend “erishib bo‘lmaydigan ideal”ni sotishga emas, odamlarning hayotini yaxshiroq va osonroq qilishga intiladi. Go‘zallik sanoatida bunday yondashuv kam uchraydi.

Selena nafaqat brendga egalik qiladi, balki mahsulot tarkibidan to uning qadoqlanishigacha bo‘lgan ishlab chiqarishning barcha bosqichlarida qatnashadi: “Men odamlarga har doim va har joyda boricha bo‘lishlari mumkinligini ko‘rsatmoqchi edim: Men ular o‘zlarini muhim his qilishlarini xohladim”, deb tushuntiradi u. Brend daromadlarining bir qismi qo‘shiqchining xayriya fondiga ketadi, u ruhiy muammolarga duch kelgan odamlarga bepul yordam beradi.

Go‘zallik biznesi va fond bilan ishlash Selenaning ijodiy faoliyatiga xalaqit bermaydi: u qo‘shiqlar kuylaydi, kinoda juda muvaffaqiyatli rol o‘ynaydi va hatto filmlar va seriallarni ishlab chiqaradi.

Shakira: kiyim brendi va xayriya fondi

Kolumbiyalik qo‘shiqchi va model 2001-yilda, o‘zining mashhurlik cho‘qqisida Dance sport kiyim brendini ishga tushirdi. 2005-yilda u S by Shakira deb qayta nomlandi va sport uchun mo‘ljallangan mahsulotlarning keng qatoriga mualliflik atiri ham qo‘shildi.

Ammo uning hayotidagi asosiy biznes moda emas. 1997-yildan beri qo‘shiqchi Kolumbiyadagi kambag‘al hududlardagi bolalarga taʼlim olish imkoniyatini beruvchi Pies Descalzos Foundation (Yalangoyoqlar fondi)ni rivojlantirib kelmoqda. Bu vaqt ichida fond 150 mingdan ortiq bolaga kelajak uchun imkoniyat berdi va 2023-yilda oltita yangi maktab qurdi.

Shakira intervyularining birida uning “Gremmi”si, shon-shuhrati va martaba cho‘qqilari borligini, lekin aynan fond uning uchun eng katta faxr manbayi bo‘lib qolishini aytgan.