Rossiyaning eng mashhur va muvaffaqiyatli qo‘shiqchilardan biri, xalq artisti va musiqiy sahnada uzoq yillik faoliyatiga ega bo‘lgan Alla Pugachyova Borisovna joriy yil 15-aprel kuni 76 yoshni qarshi oldi.
Pugachyova o‘zining noyob ovozi va qo‘shiqlari bilan millionlab yuraklarni zabt etgan san’atkor. U hayoti davomida nafaqat ko‘plab hit qo‘shiqlari bilan, balki shaxsiy hayoti va oila a’zolari bilan ham omma e’tiborida bo‘lgan. Bugungi kunda xonanda o‘z ijodiy faoliyatini davom ettirib, yangi qo‘shiqlarini taqdim etishda davom etmoqda. Quyida Alla Pugachyovaning hozirgi hayoti hamda ijodiy faoliyati haqida so‘z yuritiladi.
Isroildagi hayot
Alla Pugachyova 2022-yil boshlarida Rossiyadagi siyosiy o‘zgarishlar va shaxsiy xavfsizlikni ta’minlash maqsadida oilasi bilan Isroilga ko‘chib o‘tdi. U yangi imkoniyatlar, shaxsiy erkinlik va bolalariga yaxshi ta’lim berish uchun shunday qarorni qabul qildi. Isroilda oilasi bilan Kesariya shahrida yashay boshladi va bu uning hayotida yangi bosqichni boshlab berdi.
Isroilning Rublyovkasi deb ataladigan Kesariya shahrida yulduzli oila katta uyni ijaraga olgan. Mulk Maksim Galkinning ukasiga tegishli. 2023-yilda esa uning uyida o‘g‘irlik sodir bo‘lgani haqida xabarlar paydo bo‘ldi. Alla bu xabarga ijtimoiy tarmoqlarda izoh berdi:
“Hashamatli saroyimga o‘g‘ri tushgani haqida xabar o‘qiganimda xayolimga kelgan birinchi o‘y shunday bo‘ldi: bunday xabarlarni yozayotgan va tarqatayotgan insonlarning aqli joyida emas. Birinchidan, men hozir boshqa yerda yashayman, ikkinchidan esa, uyimga o‘g‘ri tushgani yo‘q”, deya norozilik bildirdi.
Dalahovlisini sotmoqda
Rossiya OAVlariga ko‘ra, 2023-yil bahorida Pugachyovaga qarshi sud ishi ochilgan. Aniqlanishicha, Istradagi sohil bo‘yida joylashgan uyning ijara haqi o‘z vaqtida to‘lanmagan. Uy-joy esa Primadonnaning nabirasi Nikita Presnyakov nomiga o‘tkazilgan. So‘ng Alla Borisovna jarimani to‘lagan, keyinchalik bu uyning sotilishi haqida xabarlar tarqalgan.
Qo‘shiqlar yozishda davom etmoqda
Rossiyada yashagan davrida xonanda uzoq vaqt davomida qo‘shiqlar chiqarmaganini va o‘zining xonandalik faoliyatini tugatishi mumkinligini aytgan edi. Ammo ko‘chish yangi ijodlar uchun ilhom manbaiga aylandi. 2024-yilda Pugachyova “P.S.” nomli albomni chiqarib, o‘zining eski yubiley konsertida yangragan qo‘shiqlarini jamladi. 2025-yilda esa u ikki ta yangi qo‘shiqni taqdim etdi.
Ivrit tilini o‘rganmoqda
Hozirgi kunda Alla Pugachyova va uning farzandlari faol ravishda ivrit tilini o‘rganmoqdalar. Buning uchun yulduzli oila professional o‘qituvchilar yordamiga murojaat qilishgan.
Qizi Kristina Orbakayte bilan kamdan-kam ko‘rishadi
Rossiyadan ketganidan so‘ng Alla Borisovna oila a’zolari bilan kamdan-kam uchrasha boshladi. Xonanda ba’zan qizi Kristina Orbakayte (u AQSHda yashaydi) bilan Yurmala yoki Isroilda uchrashib turadi.
Farzandlarini nufuzli maktabga bergan
Liza va Garri Isroilda o‘qishni davom ettirmoqda. Rossiyada ular Moskva yaqinidagi matematika va xorijiy tillar chuqurlashtirilgan gimnaziyasida tahsil olishgan. Hozirda ham ular o‘sha yerda o‘qishmoqda, faqat darslar endi onlayn shaklda o‘tkazilmoqda. Bunday ta’lim orqali bolalar kelajakda Rossiya attestatini olish imkoniyatini saqlab qoladi.
Bundan tashqari, Liza va Garri Isroildagi eng nufuzli maktablardan biri bo‘lgan Amerika xalqaro gimnaziyasida ham o‘qimoqda. Ushbu o‘quv yurtini tamomlaganlar AQSH va Yevropaning eng yaxshi universitetlariga kirish imkoniyatiga ega bo‘ladi. Maktabda ta’lim ingliz tilida olib boriladi.
Ma’lumot uchun: Alla Pugachyova Mixail Ippolitov-Ivanov nomidagi musiqa maktabida o‘qigan. 1966-yilda shu o‘qishning xor-dirijor bo‘limini tamomlagan. Keyinchalik, 1981-yilda Anatoliy Lunacharskiy nomidagi davlat teatr san’ati instituti (hozirgi GITIS)ning “Estrada rejissurasi” mutaxassisligini bitirgan.
U 16 yoshligida Umumittifoq radiosining “Xayrli tong” dasturi uchun “Robot” qo‘shig‘ini yozgan, bir yil o‘tgach esa “Yoshlik” radiostansiyasi jamoasi bilan birga G‘arbiy Sibir bo‘ylab o‘zining dastlabki gastrol safariga otlangan. U yakkaxon ijodkor bo‘lishidan avval “Noviy elektron”, “Moskvichi”, “Ritm” kabi ko‘plab jamoalar bilan birga qo‘shiq kuylagan. O‘z ijodiy faoliyati davomida Alla Pugachyova qo‘shiqlari yozilgan yuzdan ortiq plastinkalar, CD va DVD disklar chiqargan.
Izoh (0)