Joriy yilning 15-aprel kuni “O‘zsanoatqurilishbank” ATB va Toshkentdagi Singapur menejmentni rivojlantirish instituti hamkorligida “Yashil iqtisodiyotga o‘tish: muammolar va istiqbollar” mavzusida xalqaro ilmiy-amaliy konferensiya bo‘lib o‘tdi. Ushbu tadbir O‘zbekiston Respublikasida 2025-yil — Atrof-muhitni muhofaza qilish va Yashil iqtisodiyot yili deb eʼlon qilingan Davlat dasturi doirasida tashkil etildi.
Uning asosiy maqsadi — barqaror iqtisodiy rivojlanish masalalari bo‘yicha xalqaro tajribani o‘rganish, dolzarb yechimlarni muhokama qilish va professional muloqot maydoni yaratishdan iborat bo‘ldi. Konferensiyada dunyoning turli mamlakatlaridan kelgan ekspertlar, moliyaviy tashkilotlar va tadqiqot markazlari vakillari ishtirok etdi.
Ishtirokchilar orasida Jahon banki, Osiyo va Yevropa tiklanish va taraqqiyot banklari, Fransiyaning Taraqqiyot agentligi (AFD), Yashil o‘sish bo‘yicha Global institut (GGGI), shuningdek, xalqaro reyting agentligi Fitch Ratings, xalqaro audit va konsalting kompaniyasi PricewaterhouseCoopers (PwC), hamda sifat va xavfsizlik standartlarini baholash bo‘yicha xizmat ko‘rsatuvchi Bureau Veritas kompaniyasi kabi tashkilotlar ham ishtirok etdi.
Konferensiya doirasida iqlim va yashil moliya, aylanma iqtisodiyot, qayta tiklanuvchi energetika kabi masalalar bilan birga, korporativ ijtimoiy javobgarlik, atrof-muhitga taʼsirni baholash, ishlab chiqarishda shaffoflik va masʼuliyatni taʼminlashga qaratilgan xalqaro tamoyillar (ESG) to‘g‘risida ham fikr almashildi.
Shuningdek, mahsulot va xizmatlarni sifat, xavfsizlik hamda ekologik talablarga muvofiqligini tasdiqlaydigan (ISO) tizimi doirasidagi standartlarni joriy etish borasida xalqaro tajribalar taqdim etildi.
Reklama huquqi asosida.
Izoh (0)