San’atkor uchun ism va taxallus alohida brend kabidir. Ammo ba’zida shu brendning o‘zi san’atkorning ijodiy yo‘lida to‘siqqa aylanishi mumkin. Shuning uchun ba’zi xonandalar taxallusini o‘zgartirishga qaror qiladi. Bu qaror “hayotini yangi sahifadan boshlash” istagi yoki “o‘tmishdan qochishga urinish” bo‘lishi mumkin. Bugun o‘z “men”ini qaytadan yaratish uchun ismini o‘zgartirgan mashhurlar haqida hikoya qilamiz.
Paff Deddi (Puff Daddy — “Brother Love”)
Bugungi kunda P. Diddy turli mojarolar markazida. 2024-yilda reper va prodyuser zo‘ravonlik va odam savdosida ayblandi. Tergov ishlari esa davom etmoqda. Qiziq tomoni, uning so‘nggi payt imijini o‘zgartirishi aynan ismi bilan bog‘liq bo‘lgan.
Reper avval turli taxalluslarda ijod qilgan. Karyerasining boshida Shon Kombsni Puff Daddy deb tanishgan, keyin Sean John va Puffy degan ismlar bilan qo‘shiq aytgan. Darvoqe, xonanda o‘zining “Puff” laqabini bolaligida olgan. Ma’lum bo‘lishicha, u tez-tez jahli chiqqanda “puflab” yuradigan bola bo‘lgan.
So‘ngra o‘zini P. Diddy, keyin esa oddiygina Diddy deb atay boshlagan. 2017-yilda, tug‘ilgan kunida xonanda muxlislariga video yo‘llab, uni endi “Love” (Muhabbat) yoki “Brother Love” (Aka Muhabbat) deb atashlarini so‘ragan:
“Men ismimni o‘zgartirishga qaror qildim. Chunki endi avvalgiday emasman”, deb tushuntirgan.
Ammo tomoshabinlar bu gaplarni jiddiy qabul qilishmadi va xonanda P. Diddy taxallusida qoldi.
Snup Dogg (Snoop Dogg — Snoop Lion, Snoopzilla)
Yana bir ismini o‘zgartirgan reper — bu Snup Dogg. 2012-yilda Yamaykaga qilgan safaridan so‘ng xonanda o‘zini endi Snoop Lion deb atashini e’lon qilgan.
Snupning aytishicha, bu safarda u ruhiy va ijodiy jihatdan qayta tug‘ilgandek bo‘lgan va buyuk Bob Marli ruhi bilan aloqa o‘rnatgan. Unga bu ismni rastafarian diniy arboblari tavsiya qilgan. Shuningdek, u zo‘ravonlik mavzusiga to‘la rep musiqasini tark etib, faqat reggi uslubi bilan shug‘ullanishga qaror qilgan.
Ammo bir yil o‘tib, Kordozar Kelvin Brodo (uning haqiqiy ismi) yana bir bayonot berdi. Funk-albomi chiqishi arafasida u ismini Snoopzilla deb o‘zgartirdi. Keyin avvalgi uslubdagi Snoop Dogg va uning qo‘shiqlari qaytdi.
Grayms — bir harfdan iborat ism
Qo‘shiqchi Graymsning asl ismi — Kler Elis Bushe. Uning Ilon Mask bilan bo‘lgan munosabatlari haliyam butun dunyoda muhokama qilinadi. Ammo eng katta shov-shuv juftlikning o‘g‘li tug‘ilganida emas, balki unga qo‘yilgan ismda bo‘ldi. Chaqaloqqa X Æ A-12 deb nom berishgan. Bu ismda noma’lum sun’iy intellekt qisqartmasi va amerikalik razvedka samolyoti nomi yashiringan.
So‘ng Kler o‘z ismini soddalashtirishga qaror qildi. 2018-yilda xonanda Si Bushe (C Boucher) deb atay boshladi. Bu vakuumdagi yorug‘lik tezligi belgisi. Uning aytishicha, eski ismi unga hech qachon yoqmagan. Ikki yildan keyin esa u atrofdagilar uni shunchaki Si (C) deb atashlarini so‘ragan.
Xolzi — ko‘cha nomidan ilhomlangan taxallus
Xolzi (Halsey) taxallusi bilan tanilgan qo‘shiqchining asl ismi Eshli Nikolet Pranjipani. U og‘ir bolalikni boshdan kechirgan. Xonandaning ota-onasi tez-tez ish joylarini almashtirgan, bu esa doimiy ko‘chishlarga sabab bo‘lgan. Har bir yangi joyda Eshli tazyiqqa uchragan. Bu esa uni o‘z joniga qasd qilishga olib kelgan. Keyinchalik u kollejni tashlab, giyohvand moddalar bilan savdosi bilan shug‘ullangan va ota-onasi uni uydan haydab yuborganidan keyin ko‘chalarda yashashga majbur bo‘lgan.
Musiqa yo‘lida ilk qadamlarga qo‘yganida, Xolzi o‘tmish haqidagi xotiralarni butkul o‘chirishga qaror qilgan. Yangi ism sifatida esa ko‘cha nomini tanlagan — xonanda sobiq qallig‘ining uyi Bruklindagi Halsey Street ko‘chasida joylashgan edi.
Izoh (0)