Sahnada, gastrol safarlarida va qizil yo‘lakda mukammal ko‘rinishga ega bo‘lish uchun mashhurlar har narsaga tayyor. Ayrimlar sport va muvozanatli ovqatlanishni tanlasa, boshqalar o‘ta jiddiy turdagi parhezni ma’qul ko‘radi: ular qalampirli kokteyllar ichadi, nonushtaga kapers yeydi va bir muddat to‘liq ochlik e’lon qiladi. Quyidagi maqolada mashhur xonanda va aktrisalarning eng noodatiy, ammo xavfli bo‘lgan parhez sirlarini jamladik.
Beyonse — zarang siropi va limonli diyeta
“Orzumdagi qiz” filmi uchun tayyorgarlik ko‘rish paytida Beyonse sahna liboslarida ideal ko‘rinish uchun ekstremal detoksga murojaat qilgan. Uning 10 kunlik yagona “taomi” uyda tayyorlangan limonad bo‘lgan: ichimlik oddiy suv, limon sharbati, bir chimdim qalampir va zarang siropidan iborat edi. Kunning qolgan qismida xonanda boshqa hech qanday taom iste’mol qilmagan.
Ushbu og‘ir parhez tufayli Beyonse bir hafta ichida 9 kilogramm yo‘qotgan, ammo u ogohlantiradi:
“Bunday detoks barchaga birdek mos kelavermaydi va umuman olganda, detoks — vaqtinchalik chora. Men tavsiya qilgan “limonadli parhez” organizmni tozalashi mumkin, lekin tanani charchatib qo‘yadi.
Merayya Keri — faqat losos balig‘i va kapers
Merayya Keri chiroyli ko‘rinish uchun ko‘p narsaga tayyor — u hatto oshqozonning bir qismini olib tashlash operatsiyasini ham o‘tkazgan. Xonanda uchun parhez qilish odatiy holatga aylangan. Kerining eng g‘ayrioddiy diyetasi bu atigi ikki mahsulotdan iborat menyu: losos balig‘i va kapersdir. Taomga u hech qanday garnir, shirinlik yoki sous qo‘shmaydi.
Nutritsiologlar nuqtai nazaridan losos balig‘i — oqsil va foydali yog‘ manbai, kapers esa o‘simlik tolalarga boy sabzavot, unda oz miqdorda uglevodlar bo‘ladi. Ammo bunday tartib hatto kuchli iroda egalarini ham qiynab qo‘yishi mumkin. Shifokorlar ogohlantiradi: oqsilga boy diyetalar tez natija beradi, biroq buyraklar va bo‘g‘imlarga jiddiy zarar yetkazishini ham inobatga olish zarur.
Madonna — makrobiotik parhez
Xonanda Madonna 60 yoshdan oshgan bo‘lsa-da, uning qaddi-qomatiga hatto 30 yoshli ayollar ham havas qiladi. Uning siri temir intizom va makrobiotik diyetadan iborat. Ko‘p yillardan beri xonanda shakar, spirtli ichimliklar, qahva, go‘sht, tuxum va sut mahsulotlarini iste’mol qilmaydi. Madonnaning ratsionida to‘liq don mahsulotlari, sabzavotlar, dukkaklilar, baliq va dengiz mahsulotlari bor. Har birini aniq nisbatda o‘lchab, kaloriyalarni hisoblab iste’mol qiladi.
Makrobiotik parhez — bu nafaqat ovqatlanish usuli, balki hayot falsafasiga asoslangan yondashuv. Uning asosiy maqsadi tanani ichki muvozanatga olib kelish, organizmni tozalash va tabiiy hayot tarziga qaytish. Bu diyeta qadimgi Sharq falsafasiga tayanadi va Yaponiyada ayniqsa mashhur. Asosiy qoidalari:
- Yarim vegetarian parhez: go‘sht, tuxum va sut mahsulotlari iste’moldan chiqariladi yoki minimal darajada yeyiladi;
- Asosiy oziq-ovqatlar: butun donlar, sabzavotlar, dukkaklilar, yong‘oqlar, ba’zida baliq va dengiz mahsulotlaridan iborat;
- Qayta ishlanmagan mahsulotlar: imkon qadar tabiiy, konservantlarsiz ovqatlar tanlanadi;
- Tuz va shakar cheklangan: ayniqsa oq shakar va qayta ishlangan tuz iste’mol qilinmaydi;
- Ovqatlanishda ongli yondashuv: ovqatni shoshilmay, xotirjam va faqat och qolgandagina yeyish kerak.
Riz Uizerspun — nonushta, tushlik va kechki ovqat uchun bolalar pyuresi
Aktrisa Riz Uizerspunning noodatiy parhez usuli bor: unga ko‘ra, nonushta, tushlik va kechki ovqat o‘rniga bolalar pyuresi iste’mol qilinadi. Har bir ovqat uchun bir nechta bankachalar yeyiladi, kuniga maksimal 1200 kilokaloriya bo‘lishi lozim. Tuz, shakar, kofein va boshqa souslar mutlaqo cheklanadi.
Bunday parhez, albatta, tezda bir necha kilogramm vazn yo‘qotishga yordam beradi, ammo uni uzoq davom ettirib bo‘lmaydi. Chunki organizmga o‘simlik tolali moddalar va muhim ozuqalar yetib borishi shart, aks holda turli kasalliklar yuzaga keladi. Aktrisaning o‘zi ham bu usulni vaqtinchalik qo‘llaydi:
“Eng asosiysi — ko‘proq harakat qilish va ortiqcha ovqatlanmaslik”, deydi u.
Izoh (0)