Toshkent shahri va Xorazm viloyatida fuqarolarni Janubiy Koreya hamda Germaniya davlatlariga yuborishni vaʼda qilgan shaxslar ushlandi, deb xabar beradi Bosh prokuratura huzuridagi departament.
Qayd etilishicha, departament hamda DXXning Chilonzor tumani bo‘limlari tomonidan tezkor tadbir o‘tkazilgan. Tadbirda A.J. ismli shaxs fuqaro A.A.ning ishonchiga kirib, uni tanishlari yordamida Janubiy Koreya davlatiga o‘qishga yuborish hamda viza hujjatlarini tayyorlab berish evaziga 10 ming AQSH dollarini olgan vaqtida ashyoviy dalillar bilan ushlangan.
Shu kabi, departamentning Tuproqqalʼa tuman bo‘limi tomonidan o‘tkazilgan tergovga qadar tekshiruvda M.A. ismli shaxs fuqaro B.D.ni go‘yoki yuqori lavozimda ishlovchi tanishlari orqali 2 ming AQSH dollari evaziga Germaniya davlatiga ishga yuborishini aytib, shundan 500 dollar va 2,6 million so‘mini firibgarlik yo‘li bilan qo‘lga kiritgani aniqlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
Xorijga ishga noqonuniy jo‘natish holatlari
May boshlarida Toshkentda fuqaroni AQSHga noqonuniy yubormoqchi bo‘lgan yana bir guruh kishilar qo‘lga tushgandi. Shuningdek, Buxoroda 2 fuqaroni Koreyaga jo‘natishini aytib, firibgarlik yo‘li bilan 23 ming dollar olgan shaxs ushlangani, Farg‘onada esa fuqaroni Janubiy Koreyaga ishga jo‘natish uchun 7 ming 550 dollar olgan shaxs qo‘lga olingani to‘g‘risida xabar berilgandi.
Izoh (0)