“2023-yildan fuqarolarni Yaponiya va Isroilga ishlash uchun yuborish yo‘lga qo‘yiladi” — Afzal Ermatov

2023-yildan boshlab o‘zbekistonliklarga Yaponiya va Isroilda ishlash imkoniyati kengayadi. Bu haqda AOKAda bo‘lib o‘tgan matbuot anjumanida Tashqi mehnat migratsiyasi agentligi boshlig‘i Afzal Ermatov ma’lum qildi.

Afzal Ermatovning ta’kidlashicha, mazkur masalada davlatlararo bitimlar tuzilgan.

Yangi yildan boshlab Yaponiya va Isroilga qariyalarni parvarish qilish va tibbiyot sohalarida fuqarolarni ishga jo‘natish yo‘lga qo‘yiladi. Bu bo‘yicha ikki davlat o‘rtasidagi bitimlar imzolangan, – dedi u.

Ma’lum qilinishicha, ayni paytda eng ko‘p – 1,5 million o‘zbekistonlik muhojir Rossiyada ishlayotgan bo‘lib, ular asosan qurilish va yuqori malaka talab etilmaydigan sohalarda mehnat qiladi. Ko‘plab davlatlar esa ishga qabulda maxsus malaka talab qilmoqda.

Xorijiy ish beruvchi malaka va qayta tayyorlov diplomi talab qilmoqda. Fuqarolar yaqin-yaqingacha Germaniya yoki Angliyaga ishlash uchun yuborilmagan. Yevropa davlatlarida B1 sertifikati talab etiladi. Faqatgina mavsumiy ishlardagina til bilish talab qilinmaydi. Yaqinda Yaponiya va Koreyaga borib keldik. U yerlarda ham ishga qabul qilish uchun tilni kamida minimal darajada bilish talab etilyapti. Shu kunlargacha Rossiya bor-ku, ketyapti-ku, deb chegaralanib qolgandik. Lekin endi yangi davlatlarga yo‘l ochyapmiz. Masalan, Bolgariya, Ruminiyaga. Xususiy bandlik agentliklari ham to‘xtab qolgani yo‘q, izlanmoqda, – deydi Mehnat vazirligi boshqarma boshlig‘i Zohid Asqarov.

Zohid Asqarovning qo‘shimcha qilishicha, avvallari Yevropa davlatlariga ishchi viza olish qiyin bo‘lgan. Hozir ularda ishchilarga bo‘lgan talab oshgan va sayyohlik hamda ishchi vizalar olish uchun imkoniyat ko‘p.

Hammasi biznikilar borib o‘ziga berilgan majburiyatlarni bajarishiga bog‘liq. Ular ertaga nolegal holatga chiqib ketsa, mehnat shartnomasini buzib ish joyini tark etsa, kelgusida boradigan boshqa fuqarolarga salbiy ta’sir ko‘rsatishi mumkin. Ularning ham yo‘li to‘siladi.

Eslasangiz, o‘tgan yili Koreyaning mavsumiy ishini birinchi marta ochgan edik. Lekin biz yuborgan 420 nafar muhojirdan 307 nafari ish joyini tashlab qochib ketgan. Shuning uchun Koreya bizdan ishchilar olishni to‘xtatgan. Ya’ni shunaqa holatlar ham bor. Bizni fuqarolar o‘z majburiyatini to‘liq bajarsa, o‘z salohiyatini ko‘rsatsa, bu imkoniyatlar kundan kun kengayib boradi, – dedi u.

Avvalroq 2022-yilning o‘tgan davrida 35 mingga yaqin o‘zbekistonlik Rossiya, Qozog‘iston, Janubiy Koreya, Germaniya, Angliya va boshqa Yevropa davlatlariga ishga jo‘natilgani xabar qilingandi.