Kelgusida o‘zbekistonliklar Janubiy Koreyaga E-8 vizasi bo‘yicha ham ishga yuboriladi, deb xabar bermoqda Tashqi mehnat migratsiyasi agentligi axborot xizmati.
Unga ko‘ra, kambag‘allikni qisqartirish va bandlik vaziri Behzod Musayev Koreya Adliya vazirligining immigratsiya departamenti rahbari Kim Jong Do boshchiligidagi delegatsiya a’zolari bilan uchrashdi. Muloqotda Koreyada vaqtincha ishlash istagida bo‘lgan yurtdoshlarni ushbu davlatga nafaqat E-9 (noprofessional), balki E-8 (mavsumiy) hamda E-7 (professional) vizalari asosida yuborish masalalari muhokama qilindi.
Shuningdek, ikki davlat o‘rtasidagi migratsiya jarayonlarini qonuniy va xavfsiz amalga oshirish, o‘zbekistonliklarning Koreyada noqonuniy mehnat faoliyatini olib borish holatlariga butkul barham berish yuzasidan kelishib olindi.
Avvalroq Surxondaryo viloyati hokimi Ulug‘bek Qosimov Koreya xalqaro hamkorlik agentligi (KOICA) loyiha menejeri Kim Chon Bin va loyiha ijrochisi, sotib oluvchi “BJ Agro” korxonasi ijrochi direktorini qabul qilgandi. Uchrashuvda Surxondaryo viloyati Oltinsoy tumani va Koreyaning Damyang tumani o‘rtasida qishloq xo‘jaligi mahsulotlari yetishtirish borasida hamkorlik, xususan, tumanda 6 mln dollarlik loyihani amalga oshirishga investitsiya kiritish, loyiha doirasida 250 nafar yoshni Koreyaga mavsumiy ishga yuborish, brokkoli karami yetishtirishni yo‘lga qo‘yish, 100 nafar oltinsoylik fermerlarni Koreyada o‘qitish masalalari muhokama qilingan.
Izoh (0)