NATO davlatlari harbiy-havo kuchlari Niderlandiyadagi mashg‘ulotlarda Rossiyaning alyansga hujumi ssenariysini ko‘rib chiqmoqda.
Mashg‘ulotlar Leuvarden aviabazasi yaqinida 31-mart kuni Ramstein Flag 2025 nomi bilan boshlangan. Unda NATOning 18 davlatidan 100 ga yaqin samolyot, jumladan F-35, F-18 Hornet va Eurofighter Typhoon, shuningdek, dronlar va vertolyotlar ishtirok etmoqda.
Ular havo hujumlarini qaytarish, dushmanning mudofaa tizimlarini yo‘q qilish, dushmanga qarshi mudofaa paytida quruqlikdagi kuchlarni qo‘llab-quvvatlashni mashq qilgan. Manyovrlar Rossiyaga “signal” bo‘lishi kutilmoqda.
Umid qilamizki, bunday mashg‘ulotlar dushmanni ushlab turadi, dedi alyans harbiy-havo kuchlari qo‘mondoni, AQSH generali Jeyms Xeker.
O‘z navbatida, Germaniyada Red Storm Bravo harbiy mashg‘ulotlari e’lon qilingan. Unda Rossiyaning hujumi ssenariysi ham ishlab chiqiladi. 25—27-sentyabr kunlariga rejalashtirilgan mashqlarda NATO davlatlarining 800 minggacha askari ishtirok etishi kutilmoqda.
Bild nashriga ko‘ra, Germaniya razvedka xizmati va qurolli kuchlari Rossiya NATOga qarshi keng ko‘lamli urushga tayyorlanayotganini va bu urush 2030-yilgacha boshlanishi mumkinligini taxmin qilmoqda. Razvedka hisobotida Rossiya harbiy-havo kuchlari va floti Ukrainada to‘planganiga qaramay, jangovar qobiliyatni yo‘qotmagani ta’kidlangan.
Ukrainaga qarshi hujum tugagandan so‘ng, Rossiya qo‘shinlari tezda Boltiqbo‘yi davlatlari bilan chegaralarga ko‘chirilishi mumkin, deyiladi xabarda.
Rossiyaning boshqa davlatlarga ehtimoliy hujumi: mavzuga oid yangiliklar
NATO doiralaridagi manbalarga ko‘ra, Rossiya Finlyandiya va NATOning sharqiy qanotidagi boshqa davlatlarga hujum qilish rejasini ishlab chiqqan. Gap Rossiya armiyasining bir nechta bo‘linmalarining bir vaqtning o‘zida hujumi haqida ketmoqda. Unga o‘n minglab askar jalb qilinishi ehtimoli borligi aytilgan.
Financial Times nashriga ko‘ra, Rossiya Yaponiya va Janubiy Koreya bilan ehtimoliy urush uchun nishonlarning batafsil ro‘yxatini tuzgan. Ro‘yxatga 160 ta harbiy va fuqarolik infratuzilmasi obyektlari — atom elektr stansiyalari, ko‘priklar, zavodlar va qo‘mondonlik punktlari kiritilgan. 2008–2014-yillardagi maxfiy hujjatlar X-101 raketalari bilan zarbalar berishni va Yaponiya hamda Janubiy Koreyaning havo mudofaasini tekshirishni tasvirlaydi.
Yevropa diplomatiyasi rahbari Kaya Kallas Rossiya 2028-yildayoq Yevropa ittifoqiga hujum qilishi mumkinligini aytib, Yevropani mudofaa xarajatlarini oshirishga chaqirgan. NATO bilan urush 4-6 yildan keyin bo‘lishi mumkinligi ta’kidlangan.
Izoh (0)