Samarqand va Namangan viloyatlarida noqonuniy yo‘llar bilan xorijiy davlatlarga yuborishni vaʼda qilgan shaxslar qo‘lga olindi. Bu haqda Bosh prokuratura huzuridagi departament xabar berdi.
.jpg)
Ma’lum qilinishicha, departamentning Samarqand viloyat boshqarmasi tomonidan DXX va IIB xodimlari bilan hamkorlikda tezkor tadbir o‘tkazilgan. Tadbirda S.S. ismli shaxs fuqaro M.A.ni 18 ming dollar evaziga Turkiya, Qatar va Meksika davlatlari orqali Amerika Qo‘shma Shtatlariga o‘tkazib qo‘yishni vaʼda qilib, shundan 9 ming dollarni olgan vaqtida ashyoviy dalillar bilan ushlangan.
Departamentning Namangan viloyat boshqarmasi tomonidan o‘tkazilgan tergovga qadar tekshiruvda M.U. ismli shaxs fuqaro A.A.ning ishonchiga kirib, uning o‘g‘li D.N.ni Janubiy Koreya davlatiga ishga yuborish uchun tanishlari yordamida viza olib berishi evaziga 2,6 ming dollarini firibgarlik yo‘li bilan qo‘lga kiritgani aniqlanib, ushbu pullar hisobidan 300 dollarning qaytarilishi protsessual tartibda rasmiylashtirilgan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Sentyabr boshida AQSH prezidenti Jo Bayden maʼmuriyati O‘zbekistondan AQSHga odamlarni noqonuniy olib kirishga uringan jinoiy tarmoqni aniqlashga va faoliyatini to‘xtatishga muvaffaq bo‘lgani ma’lum qilingan edi. 11-sentyabr kuni Samarqandda 14 ming dollar evaziga Samarqand—Istanbul—Madrid—Nikaragua yo‘nalishi bilan AQSHga ishga jo‘natishni vaʼda qilgan shaxs qo‘lga olingandi.
Noyabr oxirlarida AQSH Ichki xavfsizlik departamenti AQSH—Meksika chegarasi orqali Amerikaga kirishga urinayotgan fuqarolarni chiqarib yuborish siyosati bo‘yicha o‘zgartirishlarni e’lon qilgandi.
Izoh (0)