Prezidenti Donald Tramp joriy etgan yangi bojlar sababli iPhone AQSHda ishlab chiqarila boshlansa, uning narxi uch baravar oshishi kutilmoqda. Bu haqda CNN xabar berdi.
Wedbush Securities moliyaviy kompaniyasi tahlilchisi Den Ayvzga ko‘ra, iPhone narxi, taxminan, 3500 dollargacha qimmatlashishi mumkin. Mutaxassis buni hozirda Osiyoda mavjud murakkab ishlab chiqarish ekotizimini qayta yaratish zarurati bilan izohlamoqda.
Telefonlarni G‘arbiy Virjiniya va Nyu Jersi shtatlaridagi zavodda ishlab chiqarasiz. Bu 3500 dollarlik iPhone bo‘ladi, dedi u.
Yuqoridagi zavodlar kompyuter mikrosxemalarini ishlab chiqaradi. Ayvz hatto ishlab chiqarish hajmining 10 foizini AQSHga ko‘chirilishi taxminan 30 milliard dollarga tushishi va 3 yil talab etishini aytdi.
Smartfon qismlarini ishlab chiqarish va yig‘ish o‘nlab yillar oldin Osiyoga ko‘chirilgan. Chunki Amerika kompaniyalari asosan dasturiy ta’minotni ishlab chiqish va mahsulot dizayniga e’tibor qaratadi. Bu harakat Apple’ni dunyodagi eng qimmat kompaniyalardan biriga aylantirishga yordam berdi.
Boj xavotirlari Apple aksiyalarini qulatdi
Yanvar oyida Apple aksiyalari narxi taxminan 25 foizga tushib ketdi. Bunga AQSH bojlarining Xitoy va Tayvanga bog‘liq Apple ta’minot zanjiriga salbiy ta’sir ko‘rsatishi mumkin, degan xavotirlar sabab bo‘lgan.
Fevral oyida Apple Xitoydan tashqarida ishlab chiqarishni kengaytirish va Trampning mamlakatga nisbatan bojlaridan qochish uchun keyingi to‘rt yil ichida AQSHga 500 milliard dollar sarmoya kiritishini e’lon qildi.
Texnik tahlilchilar ta’minot zanjirlari o‘zgarmagan taqdirda ham, iPhone narxlari oshishi mumkin, degan fikrda. Nyu Yorkning Rosenblatt Securities investitsiya bankiga ko‘ra, agar Apple yuqori tariflarning barcha xarajatlarini iste’molchilar zimmasiga yuklasa, iPhone 43 foizga qimmatlashishi mumkin.
Counterpoint Research kompaniyasining tadqiqotlar bo‘yicha vitse-prezidenti Nil Shohning fikricha, iPhone, taxminan, 30 foizga qimmatroq bo‘lishi mumkin. Ammo bu ularning qayerda ishlab chiqarilganiga bog‘liq bo‘lishi kutilmoqda.
Izoh (0)