Aktyorlik tashqaridan oson ko‘rinsa-da, ushbu kasb ham ko‘plab qurbonliklarni talab etadi. Birinchi navbatda uning vazifasi o‘z qahramonining xarakterini chuqur o‘rganish va tomoshabinlarga ishonchli tarzda yetkazishdir. Buning uchun aktyorlar ba’zan o‘z salomatligi va qadriyatlarini qurbon qilishga hamda jiddiy tavakkal qilishiga to‘g‘ri keladi.
Killian Myorfi — “Oppengeymer”
Biror rol uchun parhez qilish balki siz uchun yangilik emasdir, ammo Killian Myorfi amal qilgan o‘ta qattiq parhezga ko‘pchilik dosh bera olmaydi. Aktyorning hamkasbi Emili Blantning aytishicha, kunduzi Killian faqat bir nechta bodom yeyishi va suv ichishi mumkin edi. Bularning bari aktyorning qahramon xarakteri va tashqi ko‘rinishiga maksimal o‘xshash bo‘lishi uchun qilingan.
Men film qahramoni uchun o‘ta ozg‘in ko‘rinishim kerakligi sababli qattiq parhez tutganman. Shunday vaqtlar o‘zingiz bilan raqobatlashishga majbursiz, ammo men qilgan ishni hech kimga tavsiya etmayman, deydi Myorfi.
Orlando Blum — “Chandiq”
Orlando Blum ham karyerasi davomida xuddi shunga o‘xshash vaziyatga duch kelgan. Bunday tavsiya diyetolog tomonidan berilgan edi:
Men syomka vaqtida juda och qolishga majbur edim. So‘nggi uch hafta davomida Londonda suratga olish boshlanishidan avval biz faqat tunets balig‘i va bodring iste’mol qilganmiz, deydi aktyor.
Umumiy hisobda Blum 24 kilogramm vaznni yo‘qotdi. Shuningdek, bunday parhezdan keyin uning sog‘lig‘ida muammolar paydo bo‘ldi.
Xoakin Feniks — “Joker: ikki kishi telbaligi”
“Joker” afsonaviy roli uchun aktyor 25 kilogramm vazn tashlashiga to‘g‘ri kelgan. Biroq filmning ortidan kelgan muvaffaqiyatlar yuqoridagi fidokorlikka arziydi. “Joker”ning ikkinchi qismida esa Xoakin diyeta tutishi shart emasdi, ammo ko‘proq jismoniy mashqlar qilishga majbur edi:
Bu safar men uchun qiyinroq bo‘ldi, chunki biz ko‘p raqslarni mashq qilar edik. “Joker: ikki kishi telbaligi” filmi men uchun qiyinroq bo‘ldi. Ammo eng asosiysi, sog‘liq uchun xavfsizroq edi, deydi aktyor.
Ledi Gaga — “Joker: ikki kishi telbaligi”
Feniksning hamkasbi ham o‘ziga yarasha qurbonliklar qilishiga to‘g‘ri keldi. Harli Kvinn obraziga moslashish uchun xonandaga suratga olish paytidan tashqari ham film qahramoni ismi bilan murojaat qilingan. Chunki Ledi Gaga o‘zining Stefani ismiga javob bermagan va o‘z roliga jiddiy kirishib ketgan.
Hyu Jekman — “Dedpul va Rosomaxa”
Hyu Jekman ham hamkasblari kabi “Dedpul va Rosomaxa” filmidagi obrazi uchun qiyinchiliklarga duch keldi. Aktyor yetarli vazn orttirish uchun ko‘proq ovqatlanishi va sport bilan shug‘ullanishi kerak edi. Bir qarashda buning hech qanday qiyin joyi yo‘qdek tuyuladi, ammo aktyorning o‘zi intervyuda shunday dedi:
Men Rosomaxa obrazini gavdalantirish uchun juda ko‘p ovqatlanishim kerak edi. Biroq men tabiatan ozg‘in insonman. Shu sababli rolga tayyorgarlikning eng qiyin qismi men uchun vazn orttirish bo‘lgan, deydi Hyu Jekman.
Richard Gedd — “Kiyik bolasi”
Richard Gedd “Kiyik bolasi”ning nafaqat ssenariy muallifi, balki serialning bosh qahramoni ham edi. Bir vaqtning o‘zida ikki muhim ishni bajarish aktyorga oson bo‘lmagan:
Suratga olish maydoniga mashinada ketayotgan payt tirbandlik yoki biror voqea sababli ishga kechikishga umid qilardim. Chunki ishni boshlashdan avval xayollarimni bir joyga qo‘yishga vaqtim bo‘lar va fikrlarimni tartibga keltirar edim, deydi Gedd.
Izoh (0)