Sog‘lom turmush tarzi tarafdorlari har doim ekologik toza va tabiiy mahsulotlarga e’tibor qaratadi. Qora, qizil va sariq mayiz shunday mahsulotlardan biri bo‘lib, u nafaqat mazasi bilan, balki salomatlik uchun ko‘plab foydali xususiyatlari bilan ajralib turadi. Ushbu maqolada siz mayizning foydalari, uning tarkibidagi noyob moddalar va organizmga ko‘rsatadigan ta’siri haqida bilib olasiz.
Foydali moddalar va antioksidantlar
Mayiz uglevod, o‘simlik tolalari, kaliy, magniy va temir kabi foydali moddalarga boy. Chorak stakan mayizda taxminan 125 kilokaloriya, 32 gramm uglevod, 2 gramm kletchatka va 1 gramm oqsil mavjud. Unda hech qanday yog‘ va xolesterin yo‘q. Mayizdagi fenollar kuchli antioksidant bo‘lib, qand kasalligi, saraton va yurak kasalliklaridan himoya qiladi.
Mayizdagi kletchatka ichaklar faoliyatini yaxshilash, qondagi qand miqdorini nazorat qilishga yordam beradi va uzoq muddatga to‘q saqlaydi, shu tufayli mayiz ortiqcha vazndan xalos bo‘lish harakatida parhez tutayotgan shaxslar uchun mos keladi. Bundan tashqari resveratrol va flavonol kabi antioksidantlar yurak-qon tomir tizimini himoya qiladi.
Yurak va qon tomir salomatligida o‘rni
Tadqiqotlarga ko‘ra, muntazam mayiz iste’mol qilish qon bosimini pasaytirish, xolesterin darajasini kamaytirish va yurak-qon tomir kasalliklari xavfini tushirishga yordam beradi. Mayizdagi kaliy qon bosimni me’yorda ushlaydi, o‘simlik tolalari xolesterin zarralarining qon oqimiga kirishidan saqlaydi. Asosiysi, mayiz past glikemik indeksga ega mahsulot bo‘lib, diabetiklar iste’moli uchun ruxsat etiladi.
Hazm tizimiga ta’siri
Mayizdagi prebiotiklar va fruktoligosaxaridlar ichakdagi foydali bakteriyalarni oziqlantiradi. Ular ich qotishining oldini oladi, ichak faoliyatini yaxshilaydi va yo‘g‘on ichak saratoni xavfini kamaytiradi.
Mustahkam suyaklar
Mayiz bor, kalsiy va magniy kabi suyaklar salomatligi uchun muhim elementlarni o‘z ichiga oladi. Ular suyak to‘qimalarini shakllantirish va minerallar zichligini me’yorda saqlash uchun muhim hisoblanadi.
Teri salomatligi
Mayizdagi polifenollar, terining elastikligini saqlab turish uchun zarur bo‘lgan kollagen ishlab chiqarishga yordam beradi. Ushbu modda yallig‘lanishni kamaytiradi va terini ultrabinafsha nurlardan himoya qiladi, bu esa qarish jarayonini hamda teri kasalliklari xavfini kamaytiradi.
Energiya va immunitet manbayi
Mayizda uglevodlar ko‘pligi tufayli energiya va kuch beradigan mahsulotdir, shu sababli uni sportchilar tez-tez iste’mol iladi. Bundan tashqari, mayizdagi resveratrol nomli antioksidant immunitetni oshiradi va organizmning infeksiyalarga qarshi kurashishida ko‘maklashadi.
Kamqonlikda davo
Mayiz tarkibidagi temir anemiyaning oldini olishda muhim ahamiyatga ega. Tadqiqotlar shuni ko‘rsatadiki, mayizni temirga boy mahsulotlar bilan birgalikda iste’mol qilish gemoglobin darajasini ko‘taradi.
Mayizni qancha va qanday iste’mol qilish kerak?
Mayiz universal mahsulot bo‘lib, uni turli bo‘tqalarga, pishiriqlarga, salatlarga va hatto go‘shtli taomlariga qo‘shish yoki alohida yengil tamaddi sifatida iste’mol qilish mumkin.
Har qanday mahsulot kabi mayizda ham iste’mol me’yorlariga amal qilish muhim. Me’yorga e‘tibor berish muhim: bir kishi uchun unlik porsiya taxminan 40 grammni tashkil etadi.
Izoh (0)