O‘zbekistonda 2024-yil davomida tadqiqotlar va ishlanmalar uchun umumiy 4 trillion 581 milliard 616 million so‘m sarflangani ma’lum qilindi.
Innovatsion rivojlanish agentligiga ko‘ra, 2024-yil davomida “Ilmiy va innovatsion faoliyatni rivojlantirish strategiyasi”da belgilangan ko‘rsatkichlarga erishish bo‘yicha quyidagi yutuqlarga erishildi:
- hududlarda innovatsiya markazlari soni 216 taga yetdi (rejaga nisbatan 102,9 foiz);
- texnologik innovatsiyalar bilan shug‘ullanuvchi mahalliy sanoat korxonalari soni 265 tani tashkil etdi (101,5 foiz);
- yaratilgan yangi texnologiyalar soni 192 ta (103,2 foiz);
- yillik ro‘yxatga olingan patentlar soni 165 taga yetdi (201,2 foiz);
- xorijiy tashkilotlar bilan hamkorlikda amalga oshirilgan ilmiy, innovatsion va texnologik loyihalar soni 92 ta (116,5 foiz);
- ro‘yxatga olingan startaplar soni 531 taga yetkazildi (101,1 foiz).
Shuningdek, agentlik tomonidan moliyalashtirilgan tijoratlashtirish va startap loyihalari doirasida xususiy sektor tomonidan tadqiqot va ishlanmalarga yo‘naltirilgan investitsiyalar hajmi deyarli 800 million so‘mga oshib, 5 milliard 510 million so‘mni tashkil etdi.
Bundan tashqari, ilmiy-tadqiqot loyihalari doirasida xorijdan 10,82 million AQSH dollari (139 milliard 150 million so‘mdan ortiq) miqdorida beg‘araz grant mablag‘lari jalb qilindi.
O‘zbekistonda ta’lim sifatini tashqi baholash bilan shug‘ullanuvchi tuzilma tashkil etiladi. So‘nggi yillarda ta’lim sohasida xususiy sektorga berilgan imkoniyatlar tufayli 71 ta xususiy oliygoh va 51 ta xususiy texnikum tashkil etilib, ularda 500 ming nafarga yaqin talaba va o‘quvchilar tahsil olmoqda. Buning natijasida mamlakatda oliy ta’lim bilan qamrov 9 foizdan 42 foizga oshdi.
Oliy ta’lim, fan va innovatsiyalar vazirligi axborot xizmati rahbari Nazokat Abduqunduzova 2024-yilda respublikada oliy ta’lim muassasalari soni 211 tani tashkil etganini ma’lum qilgandi. Ularning 112 tasi davlat, 30 tasi xorijiy va 69 ta nodavlat oliy ta’lim muassasalari hisoblanadi. O‘shanda 2024/25-o‘quv yilida jami 1 million 167 ming nafardan ortiq talaba tahsil olishi kutilayotganini aytgandi.
Oliy ta’lim fan va innovatsiyalar vazirligi ma’lumotlariga ko‘ra, Toshkent davlat iqtisodiyot universiteti, Toshkent Kimyo xalqaro universiteti, O‘zbekiston Milliy universitetida eng ko‘p talabalarda tahsil olmoqda.
Shavkat Mirziyoyev “Yangi O‘zbekistonning asosiy ustuni — bilim, ta’lim va tarbiya bo‘ladi”, deb ta’kidlagandi. “Mamlakatimiz kelajagini ta’limda ko‘raman. Bilimi bor odam har qanday sharoitda yo‘lini topa oladi. Agar biz sifatli ta’lim bera olsak, farzandlarimizning kelajagidan xavotir olmasak ham bo‘ladi”, degan edi prezident ta’lim sohasi vakillarini taqdirlash marosimida.
Izoh (0)