Ortiqcha vazndan xalos bo‘lish uchun parhez tutgan vaqtda ham qora shokolad yeyish taqiqlanmaydi, chunki diyeta vaqtida shirinliklarni butunlay cheklash shart emas. Ammo shunday qandolat mahsulotlari borki, ular o‘ta yuqori kaloriyali va zararli shirinliklar hisoblanadi. Bunday mahsulotlardan umuman voz kechish lozim.
Kremli vafli
Albatta, vaflilar uyda tabiiy mahsulotlardan foydalangan holda bo‘yoq va ta’m kuchaytirgichsiz tayyorlansa, ularda xavf yo‘q. Krem va shokolad qo‘shilmagan 100 gramm vaflida o‘rtacha 490 kkal bo‘ladi. Ulardan 5,5 grammi oqsil, 22 grammi yog‘, 66 grammi uglevodlardir. Asosiy xavf palma yog‘ida bo‘lib, u ko‘pincha do‘kon vaflilarida ishlatiladi. Ushbu mahsulot sog‘liq uchun zararlidir.
Xolesterin darajasi yuqori bo‘lgan ayollar guruhida olib borilgan tadqiqotlar shuni ko‘rsatdiki, palma yog‘ini iste’mol qilgandan so‘ng bu ko‘rsatkich bir necha bor ko‘tarilib, yurak-qon tomir tizimida muammolarga olib keladi.
Shuning uchun ushbu toifadagi mahsulot yorliqlarini diqqat bilan o‘rganib chiqish kerak. Qadoqda tozalangan, dezodorizatsiya qilingan o‘simlik moylari degan yozuv bo‘lishi mumkin. Palma yog‘i do‘kon javonlarida joylashgan deyarli barcha un mahsuloti va shirinliklarda ishlatiladi. Shuning uchun eng yaxshi yechim — uy sharoitida ishonchli mahsulotlardan vafli tayyorlash.
Ko‘pirtirilgan krem va qaymoqli kokteyllar
Bir stakan krem va qaymoqli shirin kokteylda 1500 kilokaloriya mavjud. Bu ko‘rsatkich nonushta, tushlik va kechki ovqatning umumiy energetik qiymatini ifodalaydi. Bu kabi shirinliklar so‘zlashuv uslubida “oversheyk” deb ataladi. Qaymoqli kokteyl tarkibiga ko‘pirtirilgan qaymoq, shokoladdan tashqari, turli pechenye, donat, keks, banan, yong‘oq, zefir kabi shirinliklar qo‘shilishi mumkin.
Bunday qandolat mahsulotining asosiy zarari uning yuqori kaloriyaliligi, shakarning yuqori konsentratsiyasi, tarkibidagi vitaminlar, ozuqa moddalari va mikroelementlarning kamligidir.
Myusli va donlardan tayyorlangan batonchiklar
Bunday shirinliklar maxsus savdo rastalarida — diabetik insonlar mahsulotlari ichida sotilgani uchun foydali gazak deb qabul qilinadi. Lekin ular ham zararli mahsulotlar ro‘yxatiga kiritilgan. Sababi myusli va donlardan tayyorlangan batonchiklar tarkibida palma yog‘i, ortiqcha shakar hamda ta’m beruvchi qo‘shimchalar evaziga kaloriyasi ortib ketadi va inson salomatligiga zarar keltiradi.
Bir dona bunday batonchikda taxminan 15 gramm shakar bo‘lishi mumkin, ya’ni bu 3 osh qoshiq shakarni iste’mol qilish degani. Ba’zi ishlab chiqaruvchilar shakarni sun’iy ta’m beruvchi bilan almashtiradi, ammo bu ham vaziyatni yaxshilamaydi. Ushbu mahsulotda mavjud bo‘lgan shakar moddasi to‘liq parchalanmaydi, bu oshqozon-ichak traktida muammolar keltirib chiqaradi.
Kremli shirinliklar
Chiroyli quti, shokolad bilan qoplangan, yong‘oqlarga burkangan va qaymoq bilan boyitilgan kichkina konfetlar mazali bo‘lmasligi mumkinmi? Ammo bunday lazzat ortida salomatlik uchun xavf ham mavjud.
Birinchidan, 100 gramm bunday mahsulotning energetik qiymati 550 dan 623 kilokaloriyagacha bo‘ladi. Unga taxminan 8,2 gramm oqsil, 42,7 g yog‘ va 44,4 gramm uglevodlar kiradi. Ikkinchidan, ushbu konfetlar sezilmas darajada organizmda ko‘nikish hosil qiladi va har kuni yana konfet yegingiz keladi. Eng yomoni, kremli shirinliklarning foydali element va ozuqa moddalari nolga teng.
Uchinchidan, kremli qandolat mahsulotlari qondagi shakar darajasini ko‘taradi va husnbuzar kabi teri muammolarini ham keltirib chiqaradi. Darvoqe, ko‘p shakar yeyish insonni qaritishini unutmaslik lozim.
Izoh (0)