Vazn tashlash ko‘pchilik uchun murakkab jarayon bo‘lib tuyuladi. Ko‘pincha bunga qat’iy parhezlar, mashaqqatli jismoniy mashg‘ulotlar va cheklovlar kerakdek ko‘rinadi. Biroq aslida hammasi bundan ham oson bo‘lishi mumkin. Amerikalik Chandra Pirs bitta oddiy odatini o‘zgartirib, hech qanday maxsus parhez va sportzalga qatnamasdan 90 kilogramm vazn yo‘qotishga muvaffaq bo‘ldi. Uning hikoyasi sog‘lom turmush tarziga o‘tish qiyin emasligini yana bir bor isbotlaydi.
Bugungi kunda vazn tashlash haqida ko‘plab noto‘g‘ri qarashlar mavjud. Aslida, agar bu jarayonga to‘g‘ri yondashilsa, orzu qilingan qomatga erishish biz o‘ylagandek qiyin emas.
Chandra Pirs ismli ayol uzoq yillar davomida o‘z qomatidan mamnun bo‘lib yashadi. Biroq turmushga chiqqach, uning hayoti butunlay o‘zgarib ketdi. Er-xotin dastlab farzandli bo‘lishga shoshilmadi, aksincha, hayotdan zavqlanib yashashdi. Chandra o‘sha davrdagi ovqatlanish odatlarini shunday tasvirlaydi:
“Biz har kuni birga ishga borar, kechqurun esa turli kafelarda ovqatlanar edik. O‘zimni juda baxtli his qilardim. Doim kechki vaqt to‘yguncha ovqatlanardim va to‘ydan olti oy o‘tib, vaznim ortayotganini sezdim”, dedi u.
U bir necha bor o‘zini qo‘lga olishga urindi, ammo to‘yib ovqatlanish odatidan voz kecha olmadi. Bu holat juftlik farzand ko‘rishga qaror qilguniga qadar davom etdi. Shifokorlar uni darhol ogohlantirdi: homiladorlik yaxshi o‘tishi va bola salomatligi uchun u albatta ozishi shart edi.
Onalik sari ilk qadam tashlagan Chandra bir necha bor umidsizlikka tushdi. Bir marta homilasini yo‘qotgach, hatto farzand asrab olish haqida o‘ylay boshladi. Biroq ayol oxir-oqibat o‘z ustida ishlashga qat’iy qaror qildi va o‘zgara boshladi.
Bir yil ichida ayol 90 kilogramm vazn tashladi. Bunday natijaga erishish uchun Pirs faqatgina uyda tayyorlangan yengil taomlarni yeyishni odat qildi. Bu haqda ayol shunday deydi:
“Avvallari ko‘p fastfud, sendvich va qovurilgan kartoshka yerdim. Ayniqsa, Olive Garden restoranining makaronlarini juda yaxshi ko‘rardim, So‘ng ko‘chadagi kafe va restoranlarda ovqatlanishni to‘xtatdim va faqatgina tabiiy yetishtirilgan, organik mahsulotlardan foydalangan holda uyda taomlana boshladim”.
Bunday oddiy odat uning hayot tarzini butunlay o‘zgartirdi va ortiqcha vazndan xalos bo‘lishiga yordam berdi.
Izoh (0)