Gollivudning eng boy otalari pullarini nimaga sarflaydi?

Dueyn Jonson, Rayan Reynolds, Kevin Hart va Hyu Jekman aktyorlik faoliyatidan yaxshigina gonorar topadi. Gollivudning mazkur yulduzlari bu pullarni nimaga sarflashadi?

Dueyn Jonson

Aktyor 2024-yilgi Forbes reytingida 88 million dollar daromad bilan birinchi o‘rinni egalladi. U “Missiya: Qizil” filmidagi roli uchun pul oldi va “Moana” filmining ikkinchi qismi foydasidan sezilarli daromad ko‘rdi. Ba’zi hisob-kitoblarga ko‘ra, bugungi kunda aktyorning boyligi 800 million dollarni tashkil etadi. U bu mablag‘larni turli biznes-loyihalarga, xayriya ishlariga sarflaydi, ammo o‘zini ham unutmaydi.

U pullarini avtomobillar, ko‘chmas mulk va hatto butun boshli XFL futbol ligasini sotib olishga sarflagan. So‘nggi bir necha yil ichida Jonson o‘ndan ortiq uy sotdi va sotib oldi, ular orasida hashamatli qasrlar ham bor edi.

Bundan tashqari, uch qizning mehribon otasi Dueyn avtomobil ishqibozi ham. Uning ixtiyorida o‘ndan ortiq mashina, jumladan, maxsus buyurtma asosida ishlab chiqarilgan Pagani Huayra mavjud. Shuningdek, u dunyodagi eng tezkor xususiy samolyot deb ataydigan shaxsiy Gulfstream G650 samolyotiga ega. 

Rayan Reynolds

O‘tgan yil “Dedpul va Rosomaxa” hamda “Xayoliy do‘stlar” filmlari tufayli 85 million dollar daromad oldi. Umuman olganda, aktyorning hisobida taxminan 350 million dollar mavjud. Aktyor va uning rafiqasi Bleyk Layvlining Nyu York shtatining shimoliy qismidagi mulki mutaxassislar tomonidan 6 million dollarga baholanmoqda.

Besh yil oldin Reynolds do‘sti Rob Makelxenni bilan hamkorlikda Wrexham AFC futbol klubini 2,5 million dollarga sotib oldi. Bir necha yil avval esa Alpine Formula 1 poyga jamoasiga sarmoya kiritdi.

To‘rt farzandli Rayanning qo‘shimcha biznesi ham bor — u Tinder va Match.com kabi ilovalarni boshqaruvchi Match Group direktorlar kengashi a’zosi hisoblanadi. Shuningdek, u o‘zining Aviation American Gin alkogol brendini 2020-yilda taxminan 610 million dollarga sotgan.

Reynolds xayriya ishlari bilan ham shug‘ullanadi. Uning xarajatlari orasida Kanadaning tub aholisini toza suv bilan ta’minlaydigan Water First tashkilotiga 500 ming dollar va “Helen” hamda “Milton” to‘fonlaridan jabrlanganlarga yordam berish uchun 1 million dollar ajratgan.

Kevin Hart

Mashhur komediyachining 2024-yildagi daromadi 81 million dollarni tashkil etdi. Uning hisobidagi jami mablag‘ 450 million dollarga yetdi. To‘rt farzandli ota hashamatli ko‘chmas mulk, mashinalar, zargarlik buyumlari va kiyim-kechaklarga qiziqadi.

Kevin brilliantlar bilan bezatilgan soatlar, platina zanjirlar va ismining bosh harflarini o‘yib yozdiradigan buyumlarni doim xarid qiladi. Uning avtoparkida qiymati 2 million dollardan oshiq bo‘lgan Rolls-Royce, Mercedes va Jeep singari hashamatli avtomobillarning butun kolleksiyasi mavjud.

Bundan tashqari, Hartning Kaliforniya va Floridada har biri 7 million dollarlik uylari, shuningdek, rafiqasi uchun 4 million dollarga sotib olgan Los Anjelesdagi qo‘rg‘oni va Nyu Yorkdagi 9,5 million dollarlik pentxausi bor.

Hart xayriya tashkilotlariga ehsonlar qiladi hamda ta’lim, sog‘liqni saqlash, irqiy tenglik va faxriylarga yordam ko‘rsatish loyihalarini qo‘llab-quvvatlaydi.

Hyu Jekman

2025-yilgi ma’lumotlarga ko‘ra, Hyu Jekman 180 million dollarlik boylikka ega bo‘lib, buning 50 million dollari o‘tgan yili qo‘lga kiritilgan.

Ikki asrandi farzandning otasi Manxettendagi Vest Villij, Ist Xempton va Nyu Yorkning Chelsi tumani kabi nufuzli joylarda o‘nlab million dollarlik ko‘chmas mulkka egalik qiladi. Shu bilan birga, Hyu bu uylarning ba’zilarini yozga 500 ming dollar evaziga ijaraga beradi.

Jekman mashinalarga ham ishqiboz. Uning shaxsiy kolleksiyasida Audi R8, Porsche 911 Carrera, Range Rover, Mercedes-Benz G63 AMG, Audi Q7 hamda noyob Volkswagen Bus T1 kabi modellar mavjud.

Biroq Jekman hashamatli narsalarni to‘plash va kolleksiya yig‘ishga unchalik qiziqmaydi, deyish mumkin. Masalan, uning Laughing Man Coffee qahva kompaniyasi aktyorning boyishiga umuman hissa qo‘shmaydi: u barcha foydani xayriya ishlariga sarflaydi. Hyu, shuningdek, global isish, qashshoqlik va turli kasalliklarga qarshi kurashayotgan xayriya jamg‘armalariga yordam beradi. Bundan tashqari, u startaplar va ta’lim dasturlariga homiylik qiladi.