Голливуднинг энг бой оталари пулларини нимага сарфлайди?

Дуэйн Жонсон, Райан Рейнолдс, Кевин Ҳарт ва Ҳью Жекман актёрлик фаолиятидан яхшигина гонорар топади. Голливуднинг мазкур юлдузлари бу пулларни нимага сарфлашади?

Дуэйн Жонсон

Актёр 2024 йилги Forbes рейтингида 88 миллион доллар даромад билан биринчи ўринни эгаллади. У “Миссия: Қизил” фильмидаги роли учун пул олди ва “Моана” фильмининг иккинчи қисми фойдасидан сезиларли даромад кўрди. Баъзи ҳисоб-китобларга кўра, бугунги кунда актёрнинг бойлиги 800 миллион долларни ташкил этади. У бу маблағларни турли бизнес-лойиҳаларга, хайрия ишларига сарфлайди, аммо ўзини ҳам унутмайди.

У пулларини автомобиллар, кўчмас мулк ва ҳатто бутун бошли ХФЛ футбол лигасини сотиб олишга сарфлаган. Сўнгги бир неча йил ичида Жонсон ўндан ортиқ уй сотди ва сотиб олди, улар орасида ҳашаматли қасрлар ҳам бор эди.

Бундан ташқари, уч қизнинг меҳрибон отаси Дуэйн автомобиль ишқибози ҳам. Унинг ихтиёрида ўндан ортиқ машина, жумладан, махсус буюртма асосида ишлаб чиқарилган Pagani Huayra мавжуд. Шунингдек, у дунёдаги энг тезкор хусусий самолёт деб атайдиган шахсий Gulfstream G650 самолётига эга. 

Райан Рейнолдс

Ўтган йил “Дедпул ва Росомаха” ҳамда “Хаёлий дўстлар” фильмлари туфайли 85 миллион доллар даромад олди. Умуман олганда, актёрнинг ҳисобида тахминан 350 миллион доллар мавжуд. Актёр ва унинг рафиқаси Блейк Лайвлининг Нью Йорк штатининг шимолий қисмидаги мулки мутахассислар томонидан 6 миллион долларга баҳоланмоқда.

Беш йил олдин Рейнолдс дўсти Роб Макелхенни билан ҳамкорликда Wrexham AFC футбол клубини 2,5 миллион долларга сотиб олди. Бир неча йил аввал эса Alpine Formula 1 пойга жамоасига сармоя киритди.

Тўрт фарзандли Райаннинг қўшимча бизнеси ҳам бор — у Tinder ва Match.com каби иловаларни бошқарувчи Match Group директорлар кенгаши аъзоси ҳисобланади. Шунингдек, у ўзининг Aviation American Gin алкоголь брендини 2020 йилда тахминан 610 миллион долларга сотган.

Рейнолдс хайрия ишлари билан ҳам шуғулланади. Унинг харажатлари орасида Канаданинг туб аҳолисини тоза сув билан таъминлайдиган Water First ташкилотига 500 минг доллар ва “Ҳелен” ҳамда “Милтон” тўфонларидан жабрланганларга ёрдам бериш учун 1 миллион доллар ажратган.

Кевин Ҳарт

Машҳур комедиячининг 2024 йилдаги даромади 81 миллион долларни ташкил этди. Унинг ҳисобидаги жами маблағ 450 миллион долларга етди. Тўрт фарзандли ота ҳашаматли кўчмас мулк, машиналар, заргарлик буюмлари ва кийим-кечакларга қизиқади.

Кевин бриллиантлар билан безатилган соатлар, платина занжирлар ва исмининг бош ҳарфларини ўйиб ёздирадиган буюмларни доим харид қилади. Унинг автопаркида қиймати 2 миллион доллардан ошиқ бўлган Rolls-Royce, Mercedes ва Jeep сингари ҳашаматли автомобилларнинг бутун коллекцияси мавжуд.

Бундан ташқари, Ҳартнинг Калифорния ва Флоридада ҳар бири 7 миллион долларлик уйлари, шунингдек, рафиқаси учун 4 миллион долларга сотиб олган Лос Анжелесдаги қўрғони ва Нью Йоркдаги 9,5 миллион долларлик пентхауси бор.

Ҳарт хайрия ташкилотларига эҳсонлар қилади ҳамда таълим, соғлиқни сақлаш, ирқий тенглик ва фахрийларга ёрдам кўрсатиш лойиҳаларини қўллаб-қувватлайди.

Ҳью Жекман

2025 йилги маълумотларга кўра, Ҳью Жекман 180 миллион долларлик бойликка эга бўлиб, бунинг 50 миллион доллари ўтган йили қўлга киритилган.

Икки асранди фарзанднинг отаси Манхеттендаги Вест Виллиж, Ист Хемптон ва Нью Йоркнинг Челси тумани каби нуфузли жойларда ўнлаб миллион долларлик кўчмас мулкка эгалик қилади. Шу билан бирга, Ҳью бу уйларнинг баъзиларини ёзга 500 минг доллар эвазига ижарага беради.

Жекман машиналарга ҳам ишқибоз. Унинг шахсий коллекциясида Audi Р8, Porsche 911 Carrera, Range Rover, Mercedes-Benz G63 AMG, Audi Q7 ҳамда ноёб Volkswagen Bus Т1 каби моделлар мавжуд.

Бироқ Жекман ҳашаматли нарсаларни тўплаш ва коллекция йиғишга унчалик қизиқмайди, дейиш мумкин. Масалан, унинг Laughing Man Coffee қаҳва компанияси актёрнинг бойишига умуман ҳисса қўшмайди: у барча фойдани хайрия ишларига сарфлайди. Ҳью, шунингдек, глобал исиш, қашшоқлик ва турли касалликларга қарши курашаётган хайрия жамғармаларига ёрдам беради. Бундан ташқари, у стартаплар ва таълим дастурларига ҳомийлик қилади.