Ukraina harbiylari jangovar zonada sun’iy intellektga ega HF-1 nemis kamikadze-dronidan foydalanmoqda. Bu haqda Bild harbiy sharhlovchisi Yulian Ryopke xabar berdi.
Jurnalist birinchi bo‘lib Helsing kompaniyasi tomonidan ishlab chiqarilgan dronni ko‘rish imkoniyatiga ega bo‘ldi. Buning uchun u Sumi viloyatida Ukraina jangchilari bilan uchrashdi.
Germaniyaning mazkur droni bilan biz front chizig‘idan ancha uzoqda Rossiya logistikasiga hujum qilishimiz mumkin. Bizning nishonlarimiz zenit komplekslari, zirhli texnikalar, radioelektron kurash vositalari va mustahkamlangan pozitsiyalardir, dedi Romero chaqiruv taxallusiga ega ukrainalik ofitser.
Ta’kidlanishicha, bunday dronlar allaqachon o‘nlab nishonlarni yo‘q qilgan. HF-1 sun’iy intellektli nishonga olish tizimi bilan jihozlangan bo‘lib, bu uni Rossiyaning radioelektron kurash vositalariga bardoshli qiladi. HF-1 nishonni mustaqil ravishda yo‘q qilishi mumkin.
Germaniya Ukraina uchun 4000 ta Helsing kamikadze dronlariga buyurtma bergan. Ulardan 1050 tasi yetkazib berilgan va 2024-yil qishdan beri janglarda foydalanilmoqda. Bu vaqt ichida Ukraina Qurolli kuchlari ularning ba’zi kamchiliklarini ham aniqladi. Jumladan, sun’iy intellekt faqat nishongacha bo‘lgan oxirgi kilometrda ishlaydi, ungacha operator dronni qo‘lda boshqarishi kerak.
Frontdagi barcha Helsing dronlari doimiy takomillashtirishni talab qiladi, chunki faqat haqiqiy jang sharoitida chinakam zaif tomonlar aniqlanadi. Ayniqsa, aloqa tizimlarini jang maydoni vaziyatiga uzluksiz moslashtirish zarur. Nishonga olish algoritmlari ham zarba aniqligini oshirish uchun yanada takomillashtirilishi kerak, deydi Ukraina harbiysi.
Helsing kompaniyasi Ukraina armiyasi bilan hamkorlikda dronni takomillashtirayotganini ma’lum qilmoqda. Jumladan, eng muhim talablardan biri allaqachon amalga oshirilgan: agar HF-1 parvoz paytida aloqani yo‘qotsa, u qulamaydi, balki Rossiya radioelektron vositalarining ta’sir hududidan chiqib ketguncha havoda qoladi. Shundan so‘ng operator boshqaruvni qayta qo‘lga olishi mumkin.
Bizga bunday dronlar bilan ishlashni biladigan ko‘proq jamoalar kerak va, albatta, biz har kuni ushbu qurilmalarning sifatini oshirishimiz lozim, deydi Bild nashriga Romero.
Izoh (0)