G‘arbiy Qozog‘iston viloyatining Jonibek tumanida dron qoldiqlari topildi. Bu hududda so‘nggi vaqtlar ichida topilgan uchinchi dron bo‘ldi. Bu haqda Orda.kz xabar berdi.
Hududda yana bir noma’lum dron qulagani haqidagi dastlabki ma’lumot 24-mart kuni kechqurun paydo bo‘lgan. 25-mart kuni ertalab G‘arbiy Qozog‘iston politsiyasi dron aniqlangani sababli tekshiruv o‘tkazayotganini tasdiqlagan.
G‘arbiy Qozog‘iston viloyati politsiya departamenti vakolatli xizmatlar bilan birgalikda Jonibek tumanida uchuvchisiz uchish apparati bo‘laklariga o‘xshash buyumlar aniqlangani holati bo‘yicha tekshiruv tadbirlarini o‘tkazmoqda. Obyekt aholi punktlaridan uzoqda, chekka hududda topilgan, deydi politsiya.
Halokatga uchragan dron kimga tegishli bo‘lishi mumkinligi hozircha noma’lum. Politsiya voqea tafsilotlarini aniqlashtirmoqda.
G‘arbiy Qozog‘istonning Jonibek tumani Rossiyaning Volgograd va Saratov viloyatlari bilan chegaradosh. Yaqinda Saratov viloyatiga Ukraina dronlari hujum qilib, Engels shahridagi aerodromga kuchli zarba bergan edi.
Fevral oyida noma’lum dron G‘arbiy Qozog‘istonning Bo‘keyo‘rda tumanida topilgan. Bir oy o‘tgach, Tasqal’a tumani hududida yana bir dron aniqlandi. Harbiy mutaxassis ikkinchi dron tashqi ko‘rinishidan Rossiyaning Shahed’iga o‘xshashligini va hatto tegishli belgiga ega ekanini ma’lum qildi. Rossiya mazkur dronlardan Ukrainaga qarshi hujumlarda keng foydalanib kelmoqda.
Izoh (0)