Rossiya va Xitoy kompaniyalari Rossiya Ukraina bilan urushda foydalanayotgan Eron Shahed’lariga o‘xshash xususiyatlarga ega hujumchi dronni birgalikda ishlab chiqishni boshladi, deya Bloomberg xabar berdi.
Nashr manbalariga ko‘ra, hamkorlik bo‘yicha muzokaralar 2023-yilda bo‘lib o‘tgan, 2024-yilda esa Rossiyaga dronlar jo‘natishga tayyorgarlik doirasida ishlab chiqish va sinovdan o‘tkazish ishlari boshlangan.
Manbalar dron modeli nomini ochiqlamagan, biroq Xitoy mudofaa veb-saytlari va ommaviy axborot vositalari mamlakatda Sunflower 200 nomli hujumchi dronlar ishlab chiqilayotgani haqida xabar bergan, bu esa tavsifi jihatidan Eronning Shahed 136 samolyotiga o‘xshashligi aytilmoqda.
Bloomberg manbalaridan biri, AQSHning hisob-kitoblariga ko‘ra, Xitoy Rossiyaga to‘liq qurilgan dronlarni jo‘natish yoki jo‘natmaslik haqida o‘ylamoqda, ammo ayni paytda ularni yig‘ish uchun komponentlar yubormoqda. Nashr suhbatdoshlarining taʼkidlashicha, Xitoy Shahed kabi dronlarni Eron yoki Rossiyaga qaraganda tezroq ishlab chiqarishi mumkin – va bu fakt xavotirga sabab bo‘ladi.
Xitoyning AQSHdagi elchixonasi matbuot kotibi Lyu Penyuyning aytishicha, Xitoy Ukraina mojarosida ishtirok etayotgan tomonlarga qurol yetkazib bermayapti va ikki maqsadli mahsulotlar eksportini qattiq nazorat qiladi.
Rossiya prezidentining matbuot kotibi Dmitriy Peskov Xitoy bilan barcha sohalarda hamkorlikni tasdiqlagan.
Biz Xitoy bilan savdo-iqtisodiy aloqalarni rivojlantirdik, Xitoy bilan juda katta hajmdagi savdo aylanmasiga egamiz, — deydi Peskov.
Rossiya armiyasi 2022-yildan beri Ukrainaga qarshi Eronda ishlab chiqilgan Shahed-131/136 kamikadze hujumchi dronlaridan foydalanmoqda. The Washington Post nashrining yozishicha, Rossiya 2025-yilning yozigacha olti mingta shunday dron ishlab chiqarishni rejalashtirgan.
Qo‘shma Shtatlar va uning ittifoqchilari Ukrainadagi urush bo‘yicha betaraf pozitsiyani egallagan Pekinni Rossiyaga to‘g‘ridan to‘g‘ri qurol yoki o‘q-dorilar yetkazib berishga yo‘l qo‘yilmasligi haqida bir necha bor ogohlantirgan.
2024-yil aprelida Oq uy Xitoy kompaniyalariga, agar ular Moskvaga Rossiya mudofaa sanoati rivojlanishini qo‘llab-quvvatlovchi butlovchi qismlar yoki ikki tomonlama maqsadli mahsulotlar yetkazib berishda davom etsa, sanksiyalar bilan tahdid qilgan edi.
Izoh (0)