Amerikaning CNN telekanali ma’lumotlariga ko‘ra, so‘nggi 6 oy ichida Ukrainadagi frontda kamida 5 nafar amerikalik ko‘ngilli halok bo‘lgan, 2 nafarining jasadi o‘tgan juma kuni Ukrainaga qaytarilgan.
Qo‘shma Shtatlardan jami 20 dan ortiq ko‘ngillilar bedarak yo‘qolgan deb hisoblanmoqda.
Jangda halok bo‘lgan kamida besh nafar amerikalik ko‘ngillilarning jasadlari so‘nggi olti oy ichida jang maydonidan olib ketilmagan. Ulardan ikkitasi Rossiya tomonidan bosib olingan hududdan 24-yanvar kuni uzoq davom etgan muzokaralardan so‘ng Ukraina tuprog‘iga qaytarildi.
Bedarak yo‘qolgan amerikaliklarning qarindoshlari CNN telekanaliga o‘z farzandlarini dafn eta olmasliklari, yaqinlarini rasman vafot etgan deb e’lon qila olmasliklari, shuningdek, ularni internetda ta’qib qilayotgan “Rossiya internet-trollari” qiynoqqa solayotganini aytishgan.
Ukrainaning sharqidagi Pokrovsk yaqinida sentyabr oyi oxirida ikki amerikalik halok bo‘lgan, deb xabar bermoqda omon qolganlar va ularning yaqinlari.
Ulardan birortasining jasadi topilmagan.
Missuri shtatidan 25 yoshli sobiq amerikalik harbiy Zakari Ford va harbiy tajribasi bo‘lmagan yana bir amerikalik Novogrodovka qishlog‘i yaqinidagi ko‘prikni portlatish paytida dron tomonidan o‘ldirilgan.
AQSHning sobiq dengiz piyodasi, 41 yoshli pensilvaniyalik Kori Navrotskiy oktyabr oyida Rossiyaning Bryansk viloyatidagi janglarda halok bo‘lgandi. Uzoq davom etgan muzokaralardan so‘ng uning jasadi 800 ga yaqin halok bo‘lganlar bilan Ukrainaga qaytarildi.
Ukrainadagi urushda bedarak yo‘qolgan xorijliklarni qidirish bilan shug‘ullanuvchi Weatherman Foundation’dan Loren Giyomning ma’lum qilishicha, hozirda tashkilot 18 mamlakatdan 88 nafar halok bo‘lgan yoki bedarak yo‘qolgan shaxslar bo‘yicha shug‘ullanmoqda.
Ularning aksariyati bedarak yo‘qolgan, deya aniqlik kiritdi Giyom.
Shuningdek, Rossiya va Ukraina o‘rtasidagi janglarda Shimoliy koreyalik harbiylar ham halok bo‘layotgani xabar berilmoqda. G‘arb razvedkasi yanvar oyi o‘rtalariga kelib Kursk viloyatida 4 mingga yaqin shimoliy koreyalik halok bo‘lgani va yaralanganini ma’lum qilgan. Bu Ukrainaga qarshi urushda qatnashgan KXDR askarlari umumiy sonining taxminan uchdan biriga teng.
Ukraina armiyasi bunday yo‘qotishlarni bir qator sabablar bilan izohlamoqda. Jumladan, Shimoliy Koreya askarlari “Ikkinchi jahon urushi davridagi kabi” piyoda hujum qilgan va Ukraina dronlari hamda artilleriyasi uchun oson nishon bo‘lgan. Ular odatda nishonga olinsalar ham, hujumni davom ettirgan.
Bundan tashqari, asirga tushmaslik uchun Shimoliy Koreya askarlari o‘zlarini granatalar bilan portlatgan. Shuningdek, KXDR askarlari til bilan bog‘liq muammo tufayli Rossiya qo‘shinlari bilan kontaktga yaxshi kirishmagan. Hatto tasodifan Rossiya pozitsiyalariga hujum qilgan.
Katta yo‘qotishlarga qaramay, Pxenyan yaqin ikki oy ichida Rossiyaga harbiylarning yangi guruhini yuborishi mumkin. Shimoliy Koreya Moskvani qo‘llab-quvvatlash uchun 100 minggacha askar berishga tayyorligini ma’lum qilgani aytilmoqda. Ukraina razvedkasi rahbari Kirill Budanov KXDRdan qo‘shimcha kuch kelishi mumkinligini tasdiqlagan. Ammo Kiyevda Shimoliy Koreyaning ko‘p sonli yangi jangovar qismlari paydo bo‘lishini kutmayotganini aytgan.
Izoh (0)