Украина ҳарбийлари жанговар зонада сунъий интеллектга эга HF-1 немис камикадзе-дронидан фойдаланмоқда. Бу ҳақда Bild ҳарбий шарҳловчиси Юлиан Рёпке хабар берди.
Журналист биринчи бўлиб Helsing компанияси томонидан ишлаб чиқарилган дронни кўриш имкониятига эга бўлди. Бунинг учун у Суми вилоятида Украина жангчилари билан учрашди.
Германиянинг мазкур дрони билан биз фронт чизиғидан анча узоқда Россия логистикасига ҳужум қилишимиз мумкин. Бизнинг нишонларимиз зенит комплекслари, зирҳли техникалар, радиоэлектрон кураш воситалари ва мустаҳкамланган позициялардир, деди Ромеро чақирув тахаллусига эга украиналик офицер.
Таъкидланишича, бундай дронлар аллақачон ўнлаб нишонларни йўқ қилган. HF-1 сунъий интеллектли нишонга олиш тизими билан жиҳозланган бўлиб, бу уни Россиянинг радиоэлектрон кураш воситаларига бардошли қилади. HF-1 нишонни мустақил равишда йўқ қилиши мумкин.
Германия Украина учун 4000 та Helsing камикадзе дронларига буюртма берган. Улардан 1050 таси етказиб берилган ва 2024 йил қишдан бери жангларда фойдаланилмоқда. Бу вақт ичида Украина Қуролли кучлари уларнинг баъзи камчиликларини ҳам аниқлади. Жумладан, сунъий интеллект фақат нишонгача бўлган охирги километрда ишлайди, унгача оператор дронни қўлда бошқариши керак.
Фронтдаги барча Helsing дронлари доимий такомиллаштиришни талаб қилади, чунки фақат ҳақиқий жанг шароитида чинакам заиф томонлар аниқланади. Айниқса, алоқа тизимларини жанг майдони вазиятига узлуксиз мослаштириш зарур. Нишонга олиш алгоритмлари ҳам зарба аниқлигини ошириш учун янада такомиллаштирилиши керак, дейди Украина ҳарбийси.
Helsing компанияси Украина армияси билан ҳамкорликда дронни такомиллаштираётганини маълум қилмоқда. Жумладан, энг муҳим талаблардан бири аллақачон амалга оширилган: агар HF-1 парвоз пайтида алоқани йўқотса, у қуламайди, балки Россия радиоэлектрон воситаларининг таъсир ҳудудидан чиқиб кетгунча ҳавода қолади. Шундан сўнг оператор бошқарувни қайта қўлга олиши мумкин.
Бизга бундай дронлар билан ишлашни биладиган кўпроқ жамоалар керак ва, албатта, биз ҳар куни ушбу қурилмаларнинг сифатини оширишимиз лозим, дейди Bild нашрига Ромеро.
Изоҳ (0)