“Daryo” nashri 22-noyabrda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Britaniya Ukrainaga modernizatsiya qilingan Brimstone raketalarini yetkazib berdi
Buyuk Britaniya Ukrainaga yuqori aniqlikdagi Brimstone-2 raketalarini yubordi, deb xabar bermoqda The Telegraph. Modernizatsiya qilingan raketalar lazerli mo‘ljalga olish tizimi va avvalgidan ikki marta uzoqroqqa otilishi bilan ajralib turadi. London Kiyevga nechta raketa yuborgani noma’lum. Bitta snaryad narxi 175 ming funt sterlingga baholanmoqda. Parvoz masofasi samolyotdan uchirilganda 60 km, yerdan uchirilganda esa 12 kilometrga teng bo‘ladi.
Yarim yilcha avval Buyuk Britaniya Ukrainaga Brimstone-1 raketalarini yuborgan edi. Bunday raketalar odatda havodan uchiriladi, biroq Ukraina harbiylari buning uchun modifikatsiya qilingan yuk mashinalaridan foydalanadi.
Buyuk Britaniya bosh vaziri Rishi Sunak o‘tgan hafta Ukrainaga kelgan edi. Tashrifi chog‘ida u Kiyevga havo hujumiga qarshi mudofaa vositalarini, shu jumladan, 125 ta zenit qurollarini yetkazishga va vayron bo‘lgan infratuzilmani qayta tiklashda ishtirok etishga va’da bergan edi.
Rossiya neftini sotib olish bo‘yicha qo‘yiladigan sanksiyalar muddati yaqinlashmoqda
Hindistonning neftni qayta ishlash korxonalari yangi sanksiyalar kuchga kirishidan oldin Rossiyadan ko‘proq xomashyo sotib olishga intilmoqda. Bu haqda Bloomberg xabar berdi.
Boshqa xaridorlar Rossiyaning Ukrainadagi urushi tufayli importdan keyin Hindiston Rossiya nefti uchun muhim savdo nuqtasi bo‘ldi. Mamlakat Osiyodagi ikkinchi yirik xom neft importchisi bo‘lib hisoblanadi.
Hindistondagi kamida to‘rtta kompaniya 5-dekabrga qadar yuklanib, 19-yanvargacha mamlakatga yetib keladigan Rossiya neftini qidirmoqda, — deydi masaladan xabardor odamlar.
Bu muddat Rossiyaning neft sotuvlari narxini cheklash bo‘yicha AQSH boshchiligidagi chora-tadbirlar doirasida neft xaridlari uchun imtiyozli davrga to‘g‘ri keladi. Narxlarni cheklash 5-dekabr kuni Yevropa Ittifoqining Rossiya dengizidan neft importiga nisbatan sanksiyalari bilan bir qatorda amalga oshirilishi rejalashtirilgan.
Bu xomashyo oqimini ushlab turish, lekin Ukrainada urush olib borayotgan Rossiya daromadlarini kamaytirish uchun mo‘ljallangan. Narx chegarasi esa shu hafta e’lon qilinadi.
Eronga bosim kuchayib borishi natijasida, Eron Qatardagi jahon chempionatiga hujum qilishi taxmin qilinmoqda
Isroil harbiy razvedkasi rahbari general-mayor Aaron Xaliva Eron Qatardagi jahon chempionatiga hujum uyushtirishni rejalashtirayotgani haqida ogohlantirdi. Bu haqda The Times of Israel xabar bermoqda. Tel-Avivda Milliy xavfsizlik tadqiqotlari institutidagi konferensiyada chiqish qilib, Aaron Xaliva Eronni qamrab olgan norozilik namoyishlari “favqulodda o‘ziga xos holatlar” ekanini va “fuqarolar isyoni”ga aylanib ketganini aytdi. “Halok bo‘lganlar soni, milliy ramzlarga hujumlar — bular rejimni juda xavotirga solyapti, ayniqsa, sanksiyalar xalqaro bosim va murakkab iqtisodiy vaziyatni ham hisobga olganda”, — dedi u.
Xalivaning so‘zlariga ko‘ra, Eronga bosim kuchayib borishi bilan, shu jumladan, ichki bosim, Eronning javobi mintaqada ham, dunyoda ham yanada tajovuzkorroq bo‘lib bormoqda.
“Men sizga aytay, eronliklar hozir jahon chempionatiga hujum qilish imkoniyatini ham ko‘rib chiqmoqda. Ularni ushlab turgan yagona narsa — Qatarning bunga javoban munosabati”, — deya ogohlantirdi harbiy.
Eron Islom inqilobi qo‘riqchilari korpusi 21-noyabr kuni Iroq Kurdistonidagi “dissident guruhlar” shtab-kvartirasini dron va raketalardan o‘qqa tutgan edi. Ma’lum qilinishicha, qisman vayron bo‘lgan obyektlarni yo‘q qilish uchun Iroqning Kurd muxtoriyatidagi harbiy bazalari nishonga olingan. Eron Iroqda joylashgan kurd jangarilarini mamlakatda tartibsizliklarni qo‘zg‘atganlikda ayblagan. AQSH Markaziy qo‘mondonligi Tehronning mazkur hujumini qoralagan.
AQSH va Xitoy mudofaa vazirlari Ukrainadagi mojaro hamda Tayvan masalasini muhokama qildi
Xitoy mudofaa vaziri Vey Fenxe Pentagon rahbari Lloyd Ostin bilan Ukrainadagi harbiy amaliyot va Tayvan atrofidagi vaziyatni muhokama qildi, deb xabar bermoqda Xitoy Mudofaa vazirligi matbuot xizmati.
“Tomonlar xalqaro va mintaqaviy vaziyat, Ukrainadagi inqiroz, Janubiy Xitoy dengizi va Koreya yarim oroli muammosi yuzasidan fikr almashdi”, — deyiladi muassasa xabarida. Pentagon matbuot xizmati esa AQSH ham, Xitoy ham yadro qurolidan foydalanish yoki undan foydalanish bilan tahdid qilishni qoralagani haqida xabar berdi. Lloyd Ostin va Vey Fenxe, shuningdek, AQSH va Xitoy o‘rtasidagi ikki tomonlama munosabatlarni muhokama qildi. Pekin bunda Tayvanni asosiy mavzu deb atagan.
“Xitoy mudofaa vaziri Vey Fenxe Tayvan masalasi Xitoyning asosiy manfaatlarining o‘zagi va Xitoy—AQSH munosabatlaridagi qizil chiziq ekanini ta’kidladi. Tayvan bu — Xitoy, Tayvan masalasini hal qilish Xitoy xalqining shaxsiy ishi va hech qanday tashqi kuch bunga aralashishga haqli emas”, — deyiladi Xitoy Mudofaa vazirligi bayonotida.
O‘z navbatida, Ostin AQSHning “Yagona Xitoy” siyosatiga sodiqligini ta’kidladi. “U (Lloyd Ostin) status-kvodagi bir tomonlama o‘zgarishlarni rad etishini ta’kidladi va XXRni Tayvanga qarshi yanada beqarorlashtiruvchi harakatlardan tiyilishga chaqirdi”, — deyiladi Pentagon sayti bayonotida.
Eslatib o'tamiz, Avgust oyida Vakillar palatasi spikeri Nensi Pelosining Tayvanga tashrifidan keyin Pekin va Vashington munosabatlari yomonlashgan edi.
O'zbekistonda xalq ta'limi va sog'liqni saqlash tizimlarida nega davlat pullari noqonuniy sarflanmoqda?
Bugun, 22-noyabr kuni bo‘lib o‘tayotgan Oliy Majlis Qonunchilik palatasi yig‘ilishida davlat budjetining 9 oylik ijrosi muhokama qilindi. Majlisda deputat Botir Mardayev moliya vaziri Timur Ishmetovga noqonuniy sarflangan mablag‘lar bo‘yicha savol berdi.
Davlat mablag‘laridan maqsadsiz foydalanish, budjet qonunchiligini buzish holatlari to‘xtamayapti. Joriy yilning o‘tgan 9 oyi davomida tarif razryadlarining noto‘g‘ri qo‘llanishi, ish haqi va moddiy yordam to‘lovlarining ortiqcha to‘lanishi hisobiga 138 milliard so‘mga yaqin xato va kamchiliklar aniqlangan.
Xalq ta’limi tizimida 47 milliard so‘mga yaqin, sog‘liqni saqlashda 30 milliard so‘m, maktabgacha ta’limda 7 milliard va madaniyat vazirligi tizimida 5,5 milliard so‘mdan ortiq qonunbuzilishlar aniqlangan.
Bajarilmagan ishlar va xizmatlarni “bajarildi”, qilib ko‘rsatish, budjetdan ajratilgan subsidiyalar hisobidan o‘rnatilmagan uskunalarni ham “o‘rnatildi”, deb rasmiylashtirish hisobiga 100 milliard so‘mdan ortiq qonun buzilish holatlari aniqlangan. Bunday holatlarga chek qo‘yish uchun Moliya vazirligi tomonidan qanday choralar ko‘rmoqda”, – deya so‘radi deputat.
Bunga javoban, Timur Ishmetov budjet mablag‘lari sarflanishi bilan bog‘liq masalani pullarni ishlatayotgan vazirliklarning o‘zidan so‘rash kerakligini aytdi.
Albatta, bu holatga munosabatimiz salbiy.
Vazirliklar tomondan budjet mablag‘larini noto‘g‘ri ishlatilishi masalasini hadeb Moliya vazirligidan so‘rayverish noto‘g‘ri. Ko‘proq o‘sha vazirliklardan talab qilish kerak.Hamma vazirlik ustidan qaroqchi bo‘lib turgan bilan ish bitmaydi. Budjet mablag‘larining samarali ishlatilishi o‘sha mablag‘larni taqsimlovchi vazirlikka yuklatilgan. Audit tizimini takomillashtirib, raqamlashtirib boryapmiz. Lekin bu raqamlashtirish, audit tarkibi texnik xato bo‘lmasligi uchun qilinadi.
Ammo butun vazirlik atayin, “shu smetaga kattaroq pul kiritamiz”, deb maqsad qo‘ygan bo‘lsa, unda nazoratning hech qanaqa foydasi yo‘q. Buning natijasi bo‘yicha o‘sha vazirliklarga tegishli chora ko‘rish kerak deb hisoblaymiz”, – dedi vazir.
Izoh (0)