Rossiya prezidenti Vladimir Putinning qizi Yekaterina Tixonova boshchiligidagi “Innopraktika” nomi bilan mashhur bo‘lgan Milliy intellektual rivojlanish fondi Rossiyadagi eng yirik dron ishlab chiqaruvchisining aksiyadoriga aylandi. Bu haqda The Moscow Time nashri xabar berdi.
Fond fuqaro aviatsiyasining dronlarini, shuningdek, fotogrametrik ma’lumotlarni qayta ishlash uchun dasturiy ta’minot ishlab chiqaruvchi “Geoskan” kompaniyalar guruhining 10 foiz ulushini sotib olgan. Hozirda “Geoskan” asoschisi Aleksey Semenov kompaniyaning 87,5 foiziga egalik qiladi, yana 2,5 foizi kompaniya bosh direktori Aleksey Yuretskiy tomonidan nazorat qilinadi.
Ukraina “Geoskan”ga qarshi sanksiyalarni 2023-yil iyul oyi boshida kiritgan edi. Bunga Boshqirdiston hukumati rahbari Andrey Nazarovning “Geoskan-Ufa” obyektlarida Ukrainadagi urush uchun dronlar yaratilishi haqidagi bayonoti sabab bo‘ldi.
2022-yilning iyuligacha “Geoskan-Ufa” “Geoskan” kompaniyalar guruhi tarkibiga kirdi, biroq Semenov kompaniyaning 40 foizini “Ural-Treyding” bosh direktori Venera Mirzayanovga sotdi, qolgan 60 foiz ulushga egalik qildi.
“Ural-Treyding” shirkati noma’lum 67 yoshli Xolit Zaripovga tegishli. Kompaniya ko‘plab faoliyat turlari bilan shug‘ullanadi — ko‘chmas mulkni baholashdan pivo va go‘sht savdosigacha, ammo dronlarni ishlab chiqarish uning yo‘nalishi emas.
Izoh (0)