“Manchester Siti” klubi Angliya Premyer Ligasi bilan 2009—2018-yillar oralig‘ida sodir etilgan 115 ta moliyaviy qoidabuzarlik bo‘yicha sud jarayonlarini davom ettirmoqda. The Sun nashrining xabariga ko‘ra, “shaharliklar” ushbu ish bo‘yicha yuristlarga 36,7 million yevro sarflagan.
City Football Group (CFG) kompaniyasining so‘nggi moliyaviy hisobotlari e’lon qilingach, ma’lum bo‘ldiki, “Siti” rahbariyati 2023/24-yilgi mavsum oxiriga kelib, klubning yuristlarga ajratgan jami mablag‘i 36,7 million yevroni tashkil qilgan. Bu o‘tgan yilgi ko‘rsatkichdan 12,8 million yevroga ko‘p bo‘lib, haftasiga 245 ming yevro sarflanganini anglatadi.
Ushbu summa “Manchester Siti” futbolchisi Yoshko Gvardiolning bir yillik ish haqi bilan teng.
Hujjatlarda bu mablag‘ Newton Investment and Management nomidan qoplangan xarajatlar sifatida ko‘rsatilgan.
Newton Investment and Management — Abu Dabida joylashgan va “Manchester Siti” egasi shayx Mansurga tegishli kompaniya hisoblanadi. Shuningdek, ular City Football Group’ning (CFG) nazorat paketiga ham egalik qiladi. CFG esa “Manchester Siti”dan tashqari dunyoning turli mamlakatlarida joylashgan bir nechta futbol klublarini boshqaradi.
Izoh (0)