“Manchester Siti” klubi “Barselona” yarim himoyachisi Pedriga jiddiy qiziqish bildirmoqda. Bu haqida El Nacional nashriga tayanib Championat xabar bermoqda.
Ingliz klubining bosh murabbiyi Xosep Gvardiola 22 yoshli ispaniyalik futbolchini o‘z jamoasida ko‘rishni xohlamoqda. Manbalarga ko‘ra, “shaharliklar” Pedri uchun 100 million yevro taklif qilishga tayyor. Sababi yozda Kevin De Bryuyne jamoani tark etishi mumkin. Shu bois klub belgiyalik futbolchiga o‘rinbosar qidirmoqda.
Biroq, “Barselona” prezidenti Joan Laporta bu taklifni qabul qilish niyatida emas. U Pedri faqat o‘zi jamoani tark etishni istasa, transfer amalga oshishi mumkinligini taʼkidlagan.
2025-yil yanvar oyida Pedri kataloniyaliklar bilan 2030-yilgacha mo‘ljallangan yangi shartnoma imzolagan edi. Yangi kelishuvda uning tovon puli 1 milliard yevro etib belgilangan. Hozircha futbolchining o‘zi “Barselona”dan ketish istagini bildirmagan. U jamoaning yetakchilaridan biri bo‘lishini istamoqda.
Maʼlumot uchun, joriy mavsumda Pedri barcha musobaqalarda 43 o‘yinda maydonga tushib, 5 gol va 7 golli uzatma muallifiga aylandi.
Izoh (0)