Yevropaning top klublari allaqachon yozgi transfer oynasiga tayyorgarlik ko‘rmoqda. Kuchaytirish zarur bo‘lgan pozitsiyalar aniqlanmoqda va potentsial futbolchilar ro‘yxati shakllanmoqda. Har bir jamoaga doimo zarur bo‘lgan o‘yinchilardan biri esa hujumchilardir. Oldinda turgan transfer oynasida bir nechta to‘purar hujumchilar jamoasini almashtirishi kutilmoqda. Quyida yozda katta klublarning e’tibor markazida bo‘lishi taxmin qilinayotgan 10 nafar eng yaxshi hujumchi haqida ma’lumot beramiz.
Aleksander Isak (“Nyukasl”)
2024/25-yilgi mavsum: 31 o‘yinda 19 gol, 5 assist.
25 yoshli Isak hozir ayni cho‘qqisida. U Angliya Premyer Ligasi to‘purarlar poygasida 19 gol bilan uchinchi o‘rinda bormoqda (Muhammad Saloh – 27, Erling Holand – 20). Biroq “Nyukasl” bilan APL yoki Chempionlar Ligasi uchun kurashish qiyin. Shu sabab u nomdorroq jamoaga o‘tishga tayyor.
Insayder Devid Ornshteynning ma’lumotlariga ko‘ra, Isakka “Liverpul”, “Chelsi”, “Arsenal” va “Barselona” qiziqish bildirmoqda. “Nyukasl” uni sotmoqchi emas, ammo 150 million yevrolik taklif kelgudek bo‘lsa, shvetsiyalik hujumchini sotish haqida o‘ylab ko‘rishi mumkin.
Viktor Dyokeresh (“Sporting”)
2024/25-yilgi mavsum: 40 o‘yinda 39 gol, 9 assist.
Dyokeresh statistikasi bilan hammani hayratga solmoqda. U deyarli har o‘yinda gol urmoqda. “Bu Portugaliya chempionati” deyishingiz mumkin, lekin Dyokeresh Chempionlar Ligasida ham 8 o‘yinda 6 ta gol urishni uddalagan.
26 yoshli hujumchi Chempionlar Ligasida muntazam o‘ynaydigan klubga o‘tishga tayyor. Ammo unga asosiy da’vogar bo‘lib turgan “Manchester Yunayted”ga, o‘zining sobiq ustozi Ruben Amorim ishlayotgan jamoa bilan shartnoma imzolashni istamayapti.
Bild va Record.pt nashrlari xabariga ko‘ra, Dyokeresh uchun asosiy da’vogar – “Bavariya”. GiveMeSport ma’lumotiga ko‘ra, unga “Chelsi” ham qiziqish bildirmoqda. Florian Plettenberg esa “Manchester Siti” va “Barselona” ham shved futbolchisini kuzatayotganini ma’lum qildi. “Sporting” uni 70-75 million yevro evaziga sotishga tayyor, ammo futbolchi shu tempda o‘ynashni davom ettirsa, bu narx yana oshishi mumkin.
Benyamin Sheshko (“Leypsig”)
2024/25-yilgi mavsum: 35 o‘yinda 17 gol, 5 assist.
21 yoshli sloveniyalik futbolchisi qishki transfer oynasidayoq “Arsenal”ga o‘tishi mumkin edi, biroq “Leypsig” uni qo‘yib yubormadi. Ammo yozda uni tarkibda olib qolish nemis klubiga qiyin bo‘ladi.
Sheshko ajoyib texnika, tezlik va yaxshi jismoniy holatni o‘zida jamlagan (bo‘yi – 193 sm). Shu sabab “Arsenal” unga jiddiy tarzda qiziqmoqda (The Athletic). Bundan tashqari, “Manchester Yunayted” ham Sheshkoni kuzatmoqda.
GiveMeSport’ning ma’lumotiga ko‘ra, Sheshko “Chelsi”ning ham “short-listi”dan joy olgan. “Bavariya” esa Dyokeresh va Sheshko o‘rtasida tanlov qilmoqda (Bild).
Jonatan Devid (“Lill”)
2024/25-yilgi mavsum: 39 o‘yinda 22 gol, 10 assist.
Kanadalik hujumchi yozda erkin agent sifatida “Lill”ni tark etishi kutilmoqda. Uning shartnomasi 2025-yilda tugaydi va u klub bilan kelishuvni uzaytirishni istamayapti. Transfermarkt portal futbolchini 45 million yevroga baholamoqda.
Noyabr oyida Mundo Deportivo nashri Devidning “Barselona”ga o‘tish niyati borligini xabar qilgan edi. Bundan tashqari, “Inter” ham kanadalik futbolchini kuzatib bormoqda. Biroq yozga yaqin unga qiziqayotgan klublar soni ortishi aniq.
Olli Uotkins (“Aston Villa”)
2024/25-yilgi mavsum: 40 o‘yinda 14 gol, 11 assist.
Uotkins “Aston Villa”ning asosiy hujumchilaridan hisoblanadi. U nafaqat aniq zarbalari, balki hujumlarni tashkil etish qobiliyati bilan ham boshqalardan ajralib turadi. Ammo 29 yoshida uning top-klubga o‘tish imkoniyati kamayib bormoqda.
Yanvarda “Arsenal” Uotkinsning vakillari bilan muzokaralar olib borgan, ammo “Villa”ning 80 millionlik talabi londaliklarni futbolchini xarid qilish fikridan qaytishiga sabab bo‘lgan edi. Ma’lumotlarga ko‘ra, tomonlar yozda yana muzokara o‘tkazishga harakat qilib ko‘radi. Agar kelishuv amalga oshsa, futbolchini Shimoliy Londonda ko‘rishimiz mumkin.
Liam Delap (“Ipsvich Taun”)
2024/25-yilgi mavsum: 30 o‘yinda 10 gol, 2 assist.
“Manchester Siti” akademiyasi tarbiyalanuvchisi bo‘lgan Delap 2024-yil yozida “Ipsvich”ga o‘tdi va APL autsayderlaridan birida o‘zini ko‘rsatishni boshlab yubordi. 21 yoshli futbolchi APL doirasidagi 26 ta uchrashuvda maydonga tushib, 10 gol urishga erishdi. Yosh futbolchi, qolaversa unchalik kuchli bo‘lmagan jamoa safida 10 ta gol urish yaxshi natija. Shu bois Yevropaning bir qancha jamoalari Liam uchun “Ipsvich”ga taklif tayyorlashga tayyor.
Ma’lumotlarga ko‘ra, yozda u “Manchester Yunayted”ga o‘tishi mumkin. Bundan tashqari, “Chelsi” va “Tottenhem” ham Delap uchun da’vogarlik qilmoqda.
Dushan Vlahovich (“Yuventus”)
2024/25-yilgi mavsum: 33 o‘yinda 14 gol, 2 assist.
Vlahovich “Yuventus”da muammolarga duch kelmoqda. Randal Kolo Muani kelganidan so‘ng, serb hujumchisi zaxiraga tushib qoldi. La Gazzetta dello Sport nashri xabariga ko‘ra, uning klub bosh murabbiyi Tiago Motta bilan aloqalari ham yaxshi emas.
Insayder Nikolo Skiraning ma’lumotlariga ko‘ra, “Yuventus” Dushan uchun 25-30 million yevrolik taklif tushda, uni sotib yuborishga qarshi emas. Caught Offside xabariga ko‘ra, futbolchiga “Arsenal” hamon qiziqish bildirmoqda. Shuningdek, “Manchester Yunayted” ham hujumchini sotib olish haqida o'ylamoqda.
Moyze Kin (“Fiorentina”)
2024/25-yilgi mavsum: 32 o‘yinda 19 gol, 3 assist.
“Yuventus”ga qaytishi omadsizlikka uchragach, Kin “Fiorentina”ga o‘tdi va ushbu mavsum ajoyib o‘yin ko‘rsatmoqda. Futbolchi hozirgacha Florensiya klubi safida 19 ta gol urishga erishdi. Shu bois 25 yoshli hujumchi yozda top-klubga o‘tish uchun katta imkoniyatga ega bo‘lib turibdi.
Caught Offside nashri bergan ma’lumotlarga ko‘ra, futbolchini xarid qilmoqchi klub shartnomada ko‘rsatilgan 55 million yevrolik tovon pulini to‘lashi shart. Hozir “Arsenal” futbolchi uchun asosiy da’vogar bo‘lib turibdi. Londonliklar uni yozgi transfer oynasi vaqtida sotib olish variantini ko‘rib chiqishga tayyor. “Tottenhem” va “Aston Villa” ham Kin bilan shartnoma imzolash bo‘yicha taklif tayyorlamoqda.
Viktor Osimhen (“Napoli”, ijara asosida “Galatasaroy”da o‘ynamoqda)
2024/25-yilgi mavsum: 29 o‘yinda 23 gol, 5 assist.
Viktor Osimhen joriy mavsumni “Galatasaroy”da ijara asosida o'tkazmoqda. Ammo u huquqiy jihatdan “Napoli”ga tegishli. Biroq futbolchi yozda “Napoli”ni tark etishi deyarli aniq. 2024-yilda “Chelsi” bilan tuziladigan shartnoma muvaffaqiyatsizlikka uchragach, Viktor “Galatasaroy”ga ijaraga berildi. Chunki Italiya klubi futbolchini ro‘yxatga kiritmadi va transfer amalga oshmagach, futbolchi zudlik bilan o‘ziga yangi jamoa topishga to‘g‘ri keldi.
Osimhenga ikki asosiy da’vogar – “Manchester Yunayted” va “Yuventus”. Business Day nashrining xabar berishicha, “Napoli” va mankunianliklar o'rtasidagi bitim 95 foizga yakunlangan. Ma’lumotlarga ko‘ra, ingliz klubi futbolchi uchun 40 million yevro va Rasmus Xoylundni “Napoli”ga taklif qilmoqda.
Mika Bieret (“Monako”)
2024/25-yilgi mavsum: “Shturm”da: 25 o‘yinda 14 gol, 5 assist.
“Monako”da: 11 o‘yinda 10 gol, 3 assist.
2 oy avval Mika Bieretni faqatgina Avstriyada bilishardi, lekin hozir uning nomi ko‘plab joylarda tilga olinmoqda. 22 yoshli hujumchi Avstriya chempionatida o‘zini ko‘rsatgach, qishda “Monako” tomonidan 13 million yevroga sotib olindi. U Fransiyada ham yuqori natija ko‘rsatmoqda va katta klublarning e’tiboriga tushishi kutilmoqda. Daniyalik futbolchining yanvardan keyingi statistikasi ajoyib: 11 uchrashuv, 10 gol va 3 ta golli uzatma. Bieret intervyular orqali Keyn va Holandga havas qilishini aytib o‘tgan. Hozircha hech bir klub Mikaga rasmiy tarzda qiziqish bildirgani yo‘q, ammo futbolchi shu tarzda davom etsa, yozda “Bavariya” yoki “Manchester Siti” qiziqishi doirasiga tushishi mumkinligi aytilmoqda.
Championat.com saytidan tarjima qilindi
Izoh (0)