“Manchester Siti” yozgi transfer oynasida tarkibni yangilash rejasining bir qismi sifatida Manuel Akanjini “Real Madrid”ga taklif qilgan. Bu haqida 90min nashri xabar bermoqda.
Akanjining shartnomasi 2027-yilgacha amal qilsa-da, “Siti” uni transferga qo‘yishga tayyor. Manba xabariga ko‘ra, klub vakillari “Real Madrid” bilan aloqaga chiqib, shveysariyalik himoyachini taklif qilgan.
Biroq Madrid klubi ushbu taklifga unchalik qiziqish bildirgani yo‘q. 30 yoshga yaqinlashayotgan futbolchi “Real”ning uzoq muddatli rejalari uchun mos kelmaydi. Klub yosh va kelajagi porloq futbolchilarni tarkibga qo‘shishga e’tibor qaratmoqda. Bundan tashqari, Akanjining ko‘p jarohat olishi ham uning transferiga bo‘lgan shubhalarni kuchaytirgan.
Pep Gvardiola jamoaning ko‘plab tajribali futbolchilarini yozda sotib yuborishini ochiq aytdi. Tarkibni yangilash jarayoni allaqachon boshlangan bo‘lib, qishki transfer oynasida markaziy himoyachilar Abduqodir Husanov va Vitor Reys kabi futbolchilar katta summa evaziga sotib olindi. Shuningdek, yarim himoyachi Niko Gonsalesh va hujumchi Omar Marmush ham tarkibga qo‘shildi. Klub Kevin De Bryuyne, Ederson, Jek Grilish, Mateo Kovachich, Natan Ake va Manuel Akanji kabi futbolchilarga yangi jamoa topish harakatini boshlagan.
Joriy mavsumda “shaharliklar” kutilgan natijalarga erisha olmayapti. Jamoa APL turnir jadvalida beshinchi o‘rinda bormoqda va peshqadam “Liverpul”dan 22 ochko ortda qolmoqda. Shuningdek, Chempionlar ligasi pley-off bosqichida “Real”ga mag‘lub bo‘lib, musobaqadan chiqib ketdi.
Izoh (0)