Ukraina va Rossiya prezidentlari ishtirokidagi ikkinchi uchrashuv mojaroni hal etish bo‘yicha kelishuvga erishish uchun imkoniyat bo‘lishi mumkin. Bu haqda AQSH prezidenti Donald Tramp Fox News radiostansiyasi efirida aytib o‘tgan.
Uning so‘zlariga ko‘ra, Rossiya prezidenti Vladimir Putin bilan bo‘lajak muzokaralar Ukraina prezidenti Vladimir Zelenskiy ishtirokidagi ehtimoliy ikkinchi uchrashuvga tayyorgarlik bo‘ladi.
Trampning ta’kidlashicha, ikkinchi uchrashuvda Ukrainadagi mojaroni hal etish bo‘yicha kelishuvga erishish masalasi muhokama qilinadi.
Shuningdek, u Rossiya rahbari kelishuvga rozi bo‘lishi, sanksiyalar tahdidi esa Moskvani uchrashuv o‘tkazishga undagan bo‘lishi mumkinligi haqida fikr bildirgan.
Bundan tashqari Tramp Putin va Zelenskiy ishtirokidagi ikkinchi uchrashuvni o‘tkazish uchun uchta ehtimoliy joyni ko‘rib chiqayotganini qo‘shimcha qilgan.
Putin va Trampning uchrashuvi 15-avgust kuni Alyaskada o‘tkazilishi kutilmoqda. Ikki davlat rahbarlari muzokaralarining asosiy mavzusi Ukrainadagi mojaroni hal etish bo‘ladi. Xususan, prezidentlar hududlarni almashish va Kiyevning NATOga a’zo bo‘lishdan voz kechishi haqida gaplashishlari mumkin
AQSH prezidenti Ukrainadagi vaziyatni tartibga solish muhokamasi doirasida “hududlar almashinuvi” masalasi ko‘tarilayotganini ta’kidlagan. Shuningdek, u yo‘qotilgan hududlarning bir qismini Kiyevga qaytarishga urinib ko‘rishini bildirgan.
Bundan avval Ukraina prezidenti Vladimir Zelenskiy o‘zi hamda Rossiya va AQSH prezidentlari Vladimir Putin va Donald Tramp bilan uch tomonlama uchrashuv rejalashtirilganini, biroq muzokaralar sanasi hali belgilanmaganini ma’lum qildi.
Izoh (0)