Xosep Gvardiola o‘zbekistonlik himoyachi Abduqodir Husanov haqida fikr bildirdi. Murabbiy Angliya kubogi doirasidagi “Bornmut” — “Manchester Siti” o‘yini oldidan o‘tkazilgan matbuot anjumanida ishtirok etgan.
Gvardiola Husanovning “Man Siti” safida hozirga qadar ko‘p o‘ynashini kutmaganini aytdi.
“Ammo vaziyat shunday — himoyada faqat 4 futbolchi bor. Unda o‘ziga xos qobiliyatlar bor. Garchi tilni yaxshi bilmasa ham, maydonda o‘zini ko‘rsatmoqda. U bizga ko‘p yordam berdi.
Mavsum o‘rtasida kelgan futbolchilarga oson emas. Yangi o‘yinchilar, yangi liga... Ammo Abduqodir ham, Vitor Reys ham juda yaxshi. Husanov bilan ko‘proq muloqot qilishimiz kerak. Shu orqali u tilni ham, bizni ham tezroq tushunadi”, – deydi ispaniyalik mutaxassis.
Manchesterlik ustozi futbolchilar o‘z milliy terma jamoalaridan salomat qaytgani xususida ham gapirdi.
“Baʼzi futbolchilar boshqalarga qaraganda ko‘proq charchagan, lekin umumiy holat yaxshi”, — deydi u.
Maʼlumot uchun, Angliya kubogi chorak finali doirasidagi “Bornmut” — “Manchester Siti” uchrashuvi 30-mart, yakshanba kuni soat 20:30 da boshlanadi.
Izoh (0)