“Manchester Siti” 2024/25-yilgi mavsum Yevropa Chempionlar Ligasi yo‘llanmasini qo‘lga kiritgach, katta transferlarni amalga oshirishni maqsad qilgan. “Shaharliklar”ning asosiy maqsadi — La Liganing eng iqtidorli futbolchilaridan biri Niko Uilyams.
Ispaniya terma jamoasi a’zosi chempionlik uchun kurashuvchi va Chempionlar Ligasi g‘olibligiga da’vogar jamoa tarkibiga qo‘shilishni istamoqda. Shu bois uning “Manchester Siti”ga transferi amalga oshish ehtimoli ancha yuqori. Pep Gvardiola ham Uilyamsni jamoaga olib kelish g‘oyasini ma’qullagani aytilmoqda. Hozirda “shaharliklar” qiyin kunlarni boshdan o‘tkazmoqda, ammo tarkib sifati bo‘yicha hali ham Yevropaning eng kuchlilaridan biri hisoblanadi.
Jek Grilishning barqaror o‘yin namoyish eta olmayotgani va Kevin de Bryuyne MLS yoki Saudiya Pro Ligasiga yo‘l olishi mumkinligi sababli chap qanotda Uilyams asosiy futbolchilardan biri bo‘lishi kutilmoqda. Bundan tashqari, “Siti”ning hujumkor taktikasi Niko uchun mos kelishi taxmin qilinmoqda.
Futbolchining shartnomasidagi tovon puli 62 million yevroni tashkil qiladi. Agar futbolchi “Manchester Siti”ga o‘tishga rozi bo‘lsa, ingliz klubi ushbu summani to‘lashga tayyor ekanligini bildirgan.
Ma’lumot uchun, Niko Uilyams joriy mavsum La Liga doirasidagi 34 ta uchrashuvda maydonga tushib, 4 ta gol va 5 ta golli uzatma muallifiga aylangan. Uning “Atletik” bilan shartnomasi 2027-yil yoziga qadar amal qiladi.
Izoh (0)