“Манчестер Сити” клуби Англия Премьер Лигаси билан 2009—2018 йиллар оралиғида содир этилган 115 та молиявий қоидабузарлик бўйича суд жараёнларини давом эттирмоқда. The Sun нашрининг хабарига кўра, “шаҳарликлар” ушбу иш бўйича юристларга 36,7 миллион евро сарфлаган.
City Football Group (CFG) компаниясининг сўнгги молиявий ҳисоботлари эълон қилингач, маълум бўлдики, “Сити” раҳбарияти 2023/24 йилги мавсум охирига келиб, клубнинг юристларга ажратган жами маблағи 36,7 миллион еврони ташкил қилган. Бу ўтган йилги кўрсаткичдан 12,8 миллион еврога кўп бўлиб, ҳафтасига 245 минг евро сарфланганини англатади.
Ушбу сумма “Манчестер Сити” футболчиси Йошко Гвардиолнинг бир йиллик иш ҳақи билан тенг.
Ҳужжатларда бу маблағ Newton Investment and Management номидан қопланган харажатлар сифатида кўрсатилган.
Newton Investment and Management — Абу Дабида жойлашган ва “Манчестер Сити” эгаси шайх Мансурга тегишли компания ҳисобланади. Шунингдек, улар City Football Group’нинг (CFG) назорат пакетига ҳам эгалик қилади. CFG эса “Манчестер Сити”дан ташқари дунёнинг турли мамлакатларида жойлашган бир нечта футбол клубларини бошқаради.
Изоҳ (0)