Avvalroq O‘zbekistonda Leapmotor yengil avtomobillarini sertifikatlash vaqtincha to‘xtatilgani haqida xabar berilgandi. Texnik jihatdan tartibga solish sohasida nazorat inspeksiyasi matbuot xizmati ushbu holat yuzasidan izoh berdi.
Maʼlum qilinishicha, yaqinda laboratoriyada Xitoyning Leapmotor kompaniyasiga tegishli C16 rusumli avtomobil sinovdan o‘tkazildi. Natijalar shuni ko‘rsatdiki, ushbu avtomobil xalqaro standartlarga, xususan, Birlashgan Millatlar Tashkiloti tomonidan belgilangan xavfsizlik talablariga javob bermaydi (belgilangan meʼyordan 16 baravar ko‘p).
“O‘zbekiston ilmiy-sinov va sifat nazorati markazi” DMning sinov laboratoriyasi tomonidan 2025-yil 10-mart kuni SB-0309-388/25-sonli sinov bayonnomasiga asosan UzTR.237-016:2017 standarti, ilova № 3, p.44 bo‘yicha “Ustuvorlik va tashqi elektromagnit nurlanishga bardoshlilik (keng polosali elektromagnit shovqinlar)” talablariga nomuvofiqlik holati aniqlangan.
Elektromagnit moslashuvchanlik – elektron qurilmalar va tizimlar o‘rtasida elektromagnit maydonlar taʼsirini minimallashtirish uchun o‘tkaziladigan muhim sinovdir. Bunday sinovlar transport vositalari uchun ham zarur, chunki elektromagnit maydonlarning avtomobil elektron tizimlariga taʼsiri xavfsizlikka jiddiy taʼsir qilishi mumkin.
Bundan tashqari, elektromagnit nurlanishning inson salomatligiga taʼsiri ham muhim masala hisoblanadi. Tadqiqotlarga ko‘ra, yuqori darajadagi elektromagnit maydonlar organizmga salbiy taʼsir ko‘rsatishi, jumladan, asab tizimi, yurak-qon tomir tizimi va hatto saraton kasalliklari xavfini oshirishi mumkin.
“Shu sababli avtomobil tanlashda xalqaro talab va standartlarga javob beradigan mahsulotlarni afzal ko‘rishni hamda avtomobil tanlashda xavfsizlik meʼyorlariga rioya qilgan holda rasmiy dilerlarga murojaat qilishingizni so‘raymiz”, deyiladi xabarda.
Avtomobil bozori qanday holatda?
Noyabr oyida 2024-yilning III choragida O‘zbekiston avtomobil bozorida faollik darajasi oshgan bo‘lsa-da, 2023-yilgi darajada emasligi haqida xabar berilgandi. Xususan, iyul-sentyabr oylarida davlat ro‘yxatidan o‘tkazilgan avtomobillar soni 352,8 mingtani tashkil qilib, II-chorakdagiga nisbatan 76,8 mingtaga (27,8 foizga) ko‘paydi. Biroq, bu ko‘rsatkich 2023-yilning mos davridagiga nisbatan 19,9 foiz kam.
Dekabr oyi avvalida Lacetti, Nexia, Spark kabi ommabop avtomobillar narxlari pasaygani haqida xabar berilgan.
O‘zbekistonda 2024-yil oktyabrida avtomobil bozorida sotuvlar yana pasaygani aytilgan edi. Oktyabr oyida avtotransport vositalarining savdosi 102,3 ming donani tashkil etdi, bu o‘tgan oyga nisbatan 7 foizga kam. Yillik ko‘rsatkichda esa pasayish — 44 foizdan ko‘proq.
Izoh (0)