Sobiq Farhod va Shirin duetining xonandasi Farhod Sulaymonov intervyusida prodyuseri bilan uzoq davom etgan sud jarayonlari va uning talablari haqida gapirganidan keyin, bunga javoban Bobur Bobomurod ham o‘z munosabatini bildirdi.
— Bu mavzuni yopganimga 4-5 yil bo‘lib qolgandi, ammo o‘sha vaqtda ham bu haqda intervyu bermagandim. Ammo Farhod Sulaymonovning intervyusini tashlab berishgandan keyin har xil gaplar ko‘payib ketdi. Bu haqda bilmay turib, bir insonning fikri bilan xulosa chiqarayotganlardan xafa bo‘lish kerak emas. Inson saviyasidan kelib chiqqan holda, masalaga bir tomonlama yondashib, bir insonni haqoratlashi mumkin, deb hisoblayman. Guruhning tarqalishiga kelsak, tashabbus aynan o‘sha yigit Farhod Sulaymonovdan bo‘lgan. Ular aytganidek, oldimga duo so‘rab kelmagan. Faqat kelib “Siz bilan hamkorlikni to‘xtatamiz, siz bilan 10 yil ishladik, yetadi”, deyishdi. Albatta, bu gaplar bir kunlik emas. Avval u yigit o‘zi yakkaxon ijod qilmoqchi bo‘lgandi.
Bundan 10-15 yillar avval ular yonimga kelib, daromadning 50 foizi sizga deyishganida, “Yo‘q, topganimiz teng bo‘linadi”, deganman. Birdaniga ular aytganidek, guruh katta foyda olib kelmagan. Yaxshi daromadga endi-endi chiqilayotgan vaqtda unga sherik bo‘lishimni istamasdan, ketishdi. Afsuski, o‘zlari boshlagan faoliyat ham uzoq davom etgani yo‘q. Mayli, men bilan ishlashmadi, xohlashmadi, ammo shuncha yillik mehnat zoye ketganidan afsuslanaman, deydi Bobur Bobomurod.
Bobur Bobomurod hech kimni sudga bermagani va ularning birortasida ishtirok etmagani haqida gapirdi.
— Masalaga faylasufona qarayman, bu hayotda 40 yil birga yashagan er-xotinlar ham ajralib ketishi mumkin. Shou-biznesda bunday hamkorlikning to‘xtalishi tez-tez bo‘lib turadigan jarayon. Faqat tushunmayotganim, oradan shuncha vaqt o‘tganidan keyin bu gaplarni qo‘zg‘ashning nima keragi bor edi?
“Sudda g‘alaba qildik”, debdi. Birinchidan, men ularni sudga bergan emasman, 10-15 ta sud bo‘lganidan ham xabarim yo‘q. Ularning birortasida ham ishtirok etgan emasman. Men Mualliflar huquqini himoya qilish palatasiga aʼzoman. Sudga meni huquqimni himoya qilish maqsadida, ular sudga daʼvo arizasi bilan murojaat qilgan. Agar o‘zim sudga berganimda, advokat yollab bo‘lsa ham, oxirigacha borgan bo‘lardim. Ammo bilaman, Allohning adolatidan ulug‘roq adolat yo‘q. Sudlarda ishtirok etmaslik sharti bilan palataga ariza berganman. Qonuniy tomondan haqligim shundaki, Farhod va Shirin brendi menda bo‘lgan, dunyo bo‘yicha prodyuser turli sabablar bilan guruh faoliyat yuritmay qo‘ygandan keyin uning nomini, yoki qo‘shiqlarini boshqa xonandalarga berishi mumkin. Intervyuda sheʼr deyilibdi, ammo ular orasida qo‘shiqlar ham bor. Chunki sheʼrini men yozmagan, ammo shunday qo‘shiq yaratishni taklif qilgan, g‘oya bergan qo‘shiqlarim ham bor.
Mayli, bu voqealar o‘tdi-ketdi, qo‘shiqlar xalqning mulkiga aylanib ulgurdi. Men ham, ular ham qo‘shiqlarni o‘zimiz bilan olib ketmaymiz. Bu qo‘shiqlarni birovga ayttirganim bilan unga yarashadimi-yo‘qmi, bunisi ham masala. Shuning uchun men talashganim yo‘q.
Bobur Bobomurod sheʼrlarini taqdim etayotganida yuridik tomonlama yondashmagani va ularga ishongani haqida gapirdi.
— Men odamlarga ishonaman. Ularga men bilan ishlash manfaatli bo‘lganki, 10 yil birga ishlashdi. Tasavvur qiling, bu xuddi bir mashina ixtiro qilinganki, ular ulovda safarga otlanishgan. Ammo yarim yo‘lga yetmay, bir ixtirochini eshikdan irg‘itib yuborib, o‘zlari yo‘lda davom etishdi. Menga ham xuddi shunday munosabat bo‘ldi. “Mayli, mensiz ijod qilmoqchi ekansizlar, qonun bo‘yicha Farhod va Shirin brendi bo‘yicha boshqa guruh qilishim mumkin-ku, g‘oyalarim asosida yaratilgan qo‘shiqlarni boshqalarga ayttirishga haqqim bor”, dedim. Ammo bu gapim ularga yoqmadi. Ammo bu ham noto‘g‘ri-da, ular hamma narsa bilan ketadi-da, men hech narsasiz qolamanmi? O‘tgan vaqt davomida mening qancha sog‘lig‘im, mehnatim ketdi. Hech narsa o‘z-o‘zidan bo‘lib qolgani yo‘q. Ular bilan hamkorlikni boshlaganimda hatto mablag‘i ham yo‘q edi, hatto avvalgi prodyuseridan katta qarz bilan kelishgan. Ikki yil ishlab, birga qarzini to‘laganmiz. Nahotki ana shu kunlarni unutib qo‘yishdi, deydi Bobur Bobomurod.
Shoir Farhod Sulaymonovning qaysi gapi uning farzandlariga og‘ir botgani va ular otasidan bunga qonuniy chora ko‘rishni so‘rashgani haqida gapirdi.
— U yigitning aytishicha, guruh bola-chaqamni ham moddiy taʼminlashi kerak, degan ekanman. Ammo o‘rtada bunday gap bo‘lgani yo‘q. Ammo dunyodagi mualliflik huquqlari bo‘yicha, har qanday ijod mahsuli u vafot etganidan keyin ham 70-75 yil mobaynida ijoddan keladigan foydadan uning farzandlari va nabiralariga ulush ajratiladi. Buni men emas, qonun belgilab bergan.
Intervyudagi bu gaplar farzandlarimga og‘ir botdi. Chunki ularning ham o‘ziga yarasha obro‘si, jamiyatda o‘z o‘rni bor. Shukrki, ular beradigan pulga qarab qolgan joylari ham yo‘q. Bolalar men nomini bilmaydigan qimmatbaho mashinalarda harakatlanishadi. “Bu masalaga qonuniy chora ko‘ring”, deyishdi. “Indamanglar”, dedim. Chunki u yigit nima deyishidan qatʼi nazar, baribir shogirdim, bir paytlar ustoz-ustoz deb etagimni tutgan, deydi Bobur Bobomurod.
Izoh (0)