O‘zbekistonga ilk bor chiqindi tashiydigan elektromobil olib kelindi, deb xabar bermoqda Ekologiya, atrof-muhitni muhofaza qilish va iqlim o‘zgarishi vazirligi matbuot xizmati.
Ma’lum qilinishicha, vazirlik tashabbusi bilan endi O‘zbekistonda chiqindi tashishda elektrda yurishga mo‘ljallangan texnika vositasidan foydalaniladi. Elektromobil Eko House chiqindi klasteri tomonidan Xitoydan keltirildi.
Xitoy kompaniyasi mutaxassisi Vey Go ushbu elektromobil atmosferaga zararsiz ekanligini, O‘zbekiston ham aynan shu jihatga eʼtibor qaratganini taʼkidladi.
“Elektromobil Xitoyning Chenju shahrida ishlab chiqarilgan. Ekologik jihatdan zararsiz. O‘zbekiston bilan o‘zaro hamkorlikdan mamnunmiz va kelajakda chiqindi tashiydigan elektromobillarni O‘zbekistonda ishlab chiqarishni rejalashtirganmiz”, — degan Vey Go.
Ma’lum qilinishicha, mashina to‘liq quvvatda 300 kilometr masofani bosib o‘tadi. Bu esa kun davomida aholi yashash punktlaridan chiqindilarni olib, maxsus poligonlarga tashish imkonini beradi. Shuningdek, 3 tonnagacha yukni bemalol ko‘tara oladi.
Elektromobil dastlab Jizzax viloyatida sinovdan o‘tkaziladi. Eʼtiborli tomoni, u tor ko‘chalarda ham yurishga mo‘ljallangan.
Maʼlumot uchun, 2023-yilda Ekologiya vazirligi tashabbusi bilan aholi yashash punktlaridan chiqindilarni olib ketishning signal usuli o‘rniga musiqali usul joriy qilingan edi. Bu aholining chiqindi yig‘adigan maxsus texnika vositalarining baland signalidan norozi bo‘lganini inobatga olib amalga oshirilgan.
Izoh (0)