Asli surxondaryolik bo‘lgan, “Afandining qizlari” loyihasi bilan mashhurlikka erishgan aktrisa Muborak Abdullayeva 26-mart kuni 27 yoshni qarshi oldi. “Dugonalar shou” ko‘rsatuvida o‘z faoliyatini boshlab, so‘ng blogerlik bilan shug‘ullangan, hozirda tasvirga olish ishlaridan anchayin uzoqlashgan Muborak hayotida katta o‘zgarishlarni amalga oshirmoqda.
“Erkin Komilovning qo‘lida tahsil olganman”
Muborak bolaligida o‘zbek san’atida alohida hurmatga sazovor inson Erkin Komilovdan sohaning sir-asrorlarini o‘rgangan.
— Maktabdagi hech bir tadbir mensiz o‘tmagan. Doim rol ijro etardim. 5-sinfda o‘qiyotgan kezlarim onam “O‘zbekfilm”ga olib borganlar. Avval o‘zim borganman, keyin meni olib borishlarini xohlab, borgim kelyapti, rol ijro etgim kelyapti, deb majburlaganman. Mayli, o‘qib ko‘rsin-chi, keyin qiziqishi qolib ketar, deb rozi bo‘lishgan. U yerda O‘zbekiston xalq artisti Erkin Komilovning qo‘lida sahna nutqi, aktyorlik mahoratidan dars olganman. Gapirsalar jim bo‘lib tinglardim, u yerda qandaydir kuch meni o‘rab olardi, deydi aktrisa.
“Blogerlik sabab universitetdan haydalganman”
Muborak talabalik yillarida reklama va vayn syomkalari sababli oliygohni tark etgan.
— Meni Instagram’da ko‘radiganlar yoshimni katta deb o‘ylaydi. Hech qachon yoshimni berkitmaganman. Toshkent madaniyat kollejining Drama teatri aktyorligi yo‘nalishida o‘qiganman. Oliygohda ham aktyorlik fakultetiga hujjat topshirib, kira olmaganman. Ijodiy imtihondan yuqori ball olgan bo‘lsam ham, testim past chiqqan. Kelasi yili bu yo‘nalishga emas, San’at nazariyasi va tarixi yo‘nalishiga kirdim. Sababi dugonalarim shu sohada o‘qirdi. Raqs, balet, teatr, kino, tasviriy san’at — umuman san’atning istalgan turi haqida o‘qitiladi. Lekin biroz afsuslanganman, chunki faqat nazariy bilimlar olamiz. Men esa sahnada maxsus kiyimlarda rol ijro etayotganimda maza qilardim. O‘sha paytda blogerlik rivojlanib ketdi va uchinchi kursda men o‘qishdan haydaldim. Syomkalar, reklamalar ko‘p bo‘lardi, eng avjiga chiqqan paytida o‘qishga vaqt ajratolmay qolganman, deydi Muborak Abdullayeva.
“ ‘Afandining qizlari’ bilan oramizda tushunmovchiliklar bo‘ldi”
Nigora Abdullaxonova, Nigina Jabborova va Muborak Abdullayeva uchun “Afandining qizlari” qisqa muddat ichida kutilmagan mashhurlik olib keldi. Ammo guruh ijodi gullab-yashnayotgan vaqtda qizlar ayrildi.
— “Afandining qizlari” bo‘lib chiqqanimizda bizni bachkana deganlar ham, yoqdi, davom eting, deganlar ham bo‘ldi. Oladigan videolarimiz hayotiy, odamlarning ichidagi mavzular. Masalan, qaynona-kelin, puli yo‘q sevishganlar. Lekin hammasining o‘z vaqt-soati bo‘larkan. Oramizda biroz kelishmovchiliklar o‘tgandir, lekin pul bilan bog‘liq emas. Bilasiz, qizlarning xarakteri ham turlicha bo‘ladi. Avvaliga Nigina chiqib ketdi, teatrdagi faoliyatimni davom ettiraman dedi. Men Nigora opa bilan videolar olishda davom etdim, lekin baribir bir qo‘limiz yo‘qdek edi. Aytganimdek, barchasining belgilangan vaqti bor. Nigora opa bilan ham, Nigina bilan ham munosabatlarim yaxshi, gaplashib turamiz, deydi u.
“Kelin ko‘ylak sig‘maganida ozishim kerakligini tushunganman”
Muborak Abdullayeva oshqozon kichraytirish operatsiyasini boshdan kechirib, hozirgi ko‘rinishiga kelgan va bundan juda mamnun. Operatsiya o‘tkazishga unga nima turtki bo‘ldi?
— Men oldin 140 kilogramm edim. Oshqozon operatsiyasini qildirib, vazn tashlaganimdan so‘ng o‘zimda ayollik jozibasi kuchayganini his qildim. Avval erkakshoda bo‘lganman, o‘g‘il bo‘la do‘stlarim ko‘p edi. Ozishim sizlarga xalaqit bermasin, o‘zim xohlasam ozib olaman, derdim. O‘zimni doim borimcha qabul qilib, borimcha sevganman. Menga hech kim hech qachon semizsan, xunuksan, ozishing kerak, demagan. Aksincha, sen ozma, shundoq shirinsan, senga ozish yarashmaydi deyishardi. O‘zim ham meni borimcha sevadigan inson keladi, deb o‘ylardim. Lekin hozir semiz ayolni hech kim yaxshi ko‘rmaydi, buni qabul qila olish kerak. Erkaklar doim chiroyli ayollarga qaragan — bu ularning fitratida bor.
140 kilogramm ekanligimda operatsiya qildirdim, ikki yil davomida 60 kilogrammga ozdim. Ya’ni tanamdan bitta Muborak chiqib ketdi. Shu sababli menga avval Muborak unday edi, hozirgi bunday bo‘lib qolgan, degan gaplarni aytmasliklarini xohlayman. Hozir boshqa Muborakman.
Men hech qachon kelin ko‘ylak kiyib rol o‘ynamayman, derdim yoki atayin juda yuqori gonorar qo‘yardim. Bir klip syomkasida kelin ko‘ylak kiyishim uchun aytgan narximni berishdi. Ammo menga kelin ko‘ylak sig‘madi. Oynaga qarab turgandim, ichimdagi Muborak yig‘ladi. Ertaga turmushga chiqsam, shunaqa xunuk kelin bo‘lamanmi, degan fikr menda juda qattiq stressga sabab bo‘ldi. Juda ko‘p sababsiz yig‘layverdim. To‘g‘ri, yuzim chiroyli bo‘lishi, hamma meni yaxshi qabul qilishi mumkin. Lekin tashqi ko‘rinishimdan o‘zim qoniqmadim. 140 kilogrammga qarab ketayotganimni hattoki bilmaganman ham. Chiroyliman, deb o‘zimni balki aldab yurgandirman.
Turkiyada operatsiya qildirishni rejalashtirib yurgan vaqtim men bormoqchi bo‘lgan shifokor Toshkentga kelib qoldi. Doktorga ham “Meni hech nima qiynamayapti, ozsam xunuk qiz bo‘lib ketmaymanmi, o‘rtacha ozsam yetadi” deganman. Shu bilan bir haftada dugonam bilan Istanbulga bordim. Operatsiyaga kirib ketayotganimda Instagram’da yig‘lab stories qo‘yganman. Sababi rahmatli bloger Farhod Mannopov noto‘g‘ri narkoz sabab olamdan o‘tgandi. Men ham juda qo‘rqqanman. Operatsiyaga yig‘lab kirib, yulduz bo‘lib chiqqanman. O‘zbekistonda televizorda men haqimda ko‘rsatishgan. Dadam hatto operatsiyaga kirganimni “Muborak Abdullayeva Istanbulda oshqozon operatsiyasini o‘tkazdi” degan xabar chiqqanda bilgan. Shundan keyin menga Instagram’da juda ko‘p ayol-qizlar qo‘shilib, ularda ham shu muammo borligini yozgan. Men operatsiyadan keyingi jarayonlarni, nima yeb-ichsam, borini qo‘ydim. Hozirgi kungacha 60 kilogramm ozdim, yana 20 kilogramm ozishni maqsad qilganman, deya o‘z hikoyasi bilan bo‘lishdi u.
“Bo‘lajak turmush o‘rtog‘im bilan do‘st bo‘lishni xohlayman”
Aktrisa qiyinchilik bilan erishilgan baxt uzoq yashaydi, degan fikrda. U otasi kabi insonga turmushga chiqmoqchi.
— Dugonalarim bilan hozir sayohat emas, taqdir haqida o‘ylaymiz (kulib). Keyin yana mayli, bir gap bo‘lar, deb kulib ketaveramiz. Shu yigitga turmushga chiqasan deyishsa, indamay ko‘nib ketadigan 18 yoshli qiz emasmiz. Turmush quradigan inson bilan dunyoqarashimiz bir-biriga to‘g‘ri kelishi kerak. Shu sabab tanlov jarayoni qiyinlashib qoladi. Instagram’da ba’zi qizlarni ko‘rib, rostdan jahlim chiqadi. Mahrga “Gelik” so‘raydi, yigit kuniga 10 ming dollar sarflasin, o‘z biznesi bo‘lsin, deydi. Balki ular ham sal o‘tib to‘g‘ri fikrlaydigan bo‘lar. Men bolalikda ota-onami ko‘rib turmush o‘rtog‘im yaxshi inson bo‘lsin, uy-joy, mashina, boylikka asta-sekin erishish mumkin, deb niyat qilganman. Qiyinchilikni yengib o‘tgan insonlar bir-birini ko‘proq qadrlaydi.
Turmush o‘rtog‘im bilan do‘st bo‘laylik, yaxshi-yomon taraflarimizni bilaylik, to‘ydan keyin o‘zimizdan kimnidir “yasab” olmaylik, ungacha hammasidan boxabar bo‘laylik, deb yoshligimdan niyat qilardim. Shunda ishonch, hurmat bo‘ladi, sevgi bo‘ladi, deb o‘ylaganman va hozirgacha shu fikrdaman. Ota-onam ham sinfdosh bo‘lishgan, lekin ular bir-biriga “Dunyoda oxirgi inson sen bo‘lib qolsang ham, sen bilan turmush qurmayman” deyishgan. Yoshlikdagi bolalarcha urishish-da. Otam kabi inson bo‘lsa, turmushga chiqardim, deya niyat qiladi Muborak.
“Ro‘mol o‘ragach, qalbim taskin topdi”
Muborak hijobga kirgach, syomkalardan uzoqlashgani va ijodni sog‘inmayotgani haqida ham so‘zladi.
— Bir yildan buyon kameradan uzoqlashganman, uyatchan bo‘lib qolganman. Instagram’da ham avvalgichalik faol emasman. Ijodni sog‘inmadim, tasvirga olish jarayonlari, kameralardan qochib yuraman. Kino, klip premyeralariga borsam ham, intervyu olamiz deyishadi, men esa intervyu berishni ham xohlamayman. Rol o‘ynash ham qo‘limdan kelmay qoldi. 2024-yilning 6-martida hijobga kirganman. O‘sha vaqtdan boshlab san’at sohasida ishlamayman, deb qaror qilganman. Shundan buyon bunga xohish-istagim yo‘q. Bu qarorimdan keyin qalbim taskin topdi. Yosh ulg‘aygani sari insonning fikrlashi o‘zgarib borarkan, deydi u.
“Syomkalarga bormasam ham, daromadim bor”
Avvallari asosiy daromadi reklamalar va telekanallardan bo‘lgan Muborakning bugungi kunda o‘z bizneslari bor.
— Instagram oxirgi 3-4 yilda juda rivojlandi. Oldin klip, seriallarda chiqqanman, lekin “Afandining qizlari” loyihasi juda katta mashhurlik ham, daromad ham bergan. Instagram orqali televideniyeda ishlaganman. Uy, mashina, sayohatlarga ham u orqali erishganman. Hozir ham daromadim Instagram’dan. Har kuni reklama olmasam ham, lekin yetarli. Do‘stlarim bilan umraga yuboradigan tur firma ham ochganmiz. Bu sheriklik asosidagi kichik biznes. Instagram olamiga kirib kelishimdan oldin ham katta o‘lchamda kiyinadigan ayollar uchun kiyim-kechak do‘koni ochgandim. Hozir arab tilidan dars olyapman, tilning grammatikasini mukammal o‘rganishga kirishdim. Vaqtim zoe ketmayapti, deydi Muborak Abdullayeva.
Izoh (0)