Sog‘liqni saqlash vazirligi, Xitoy Savdo-sanoat palatasi va Henan Costar Group kompaniyasi o‘rtasida O‘zbekiston tez tibbiy yordam xizmati uchun zamonaviy elektromobillarni yetkazib berish bo‘yicha shartnoma imzolandi. Bu haqda SSV matbuot xizmati xabar qildi.
“Uchrashuvimiz davomida 150 mln AQSH dollarlik kelishuvlarga erishildi. Ya’ni, tez tibbiy yordam xizmati uchun zamonaviy avtotransport vositalarini kerakli ravishda yetkazib beramiz. Shuningdek, yaqin kelajakda bu turdagi elektromobillarni mamalakatingizni o‘zida ishlab chiqarishni yo‘lga qo‘yamiz”, — degan Henan Costar Group kompaniyasi bosh direktori Yao Xuatin “O‘zbekiston24” telekanaliga bergan intervyusida.
Respublika tez tibbiy yordam markazi bosh direktori Abduvoit G‘afurovning ma’lum qilishicha, Iveco elektromobillari test sinovi tariqasida O‘zbekistonning turli hududlarida foydalanib ko‘riladi va natijasi bo‘yicha tez yordamga elektromobillar joriy qilinadi.
Iveco eng zamonaviy elektromobil bo‘lib, bitta quvvatda 450 kilometrgacha yuradi. Yoqilg‘i-moylash masalasida 10 baravar tejamkor. Mashina namlikka va issiqqa chidamli bo‘lib, xizmat qilish davri juda katta.
Abduvoit G‘afurov, shuningdek, Xitoy kompaniyasi buyurtma asosida bir nafar paramedik feldsher yuradigan ixcham avtomobil yaratib berganini ham ma’lum qildi. Ushbu avtomobil kuniga 15 tadan 25 tagacha chaqiruvlarni bajara oladi.
Respublika tez tibbiy yordam markazi bosh direktorining bildirishicha, O‘zbekistonda chaqiruvlarning 15 foizi gospitalizatsiya, ya’ni bemorni bevosita shifoxonaga yetkazish bilan bog‘liq, 85 foizi esa yengil chaqiriqlardir. Mashinalar shunday yengil chaqiriqlarga boradigan brigadalarga beriladi.
Xabarda aytilishicha, ushbu elektromobillar tegishli sinovlardan muvaffaqiyatli o‘tganidan so‘ng investitsiya asosida xarid qilinadi.
“Aholi salomatligi — 2030” milliy strategiyasi loyihasida tez tibbiy yordam avtomobillarining 50 foizi elektromobillar bilan to‘ldirilish vazifasi qo‘yilgandi.
Izoh (0)