Malayziya kompaniyasi O‘zbekistonda halol insulin ishlab chiqarish loyihasini amalga oshirishga qiziqish bildirmoqda. Bu haqda “Dunyo” AA xabar berdi.
Ma’lum qilinishicha, O‘zbekiston elchisi Karomiddin Gadoyev Malayziyaning Pharmaniaga Berhad kompaniyasi direktori Zulkifli Jafar bilan uchrashuv o‘tkazdi. Unda O‘zbekistonda farmatsevtika mahsulotlarini ishlab chiqarish sohasida hamkorlik qilish istiqbollari muhokama qilindi.
Zulkifli Jafar Malayziyada qandli diabet bilan kasallangan bemorlar uchun mazkur kompaniya tomonidan halol standartlari bo‘yicha birinchilardan bo‘lib insulin dorisini ishlab chiqarish yo‘lga qo‘yilgani va mamlakat hukumati buyurtmasi asosida davlat sog‘liqni saqlash muassasalariga yetkazib berilayotganini ma‘lum qildi.
Uning aytishicha, Malayziyada qandli diabet kasalligi mavjud insonlarga insulin dori vositalarini bepul tarqatish tizimi joriy etilgan.
“O‘zbekiston Farmatsevtika tarmog‘ini rivojlantirish agentligi bilan ushbu kompaniyaning bir necha turdagi dori vositalarini mamlakatimizda hamkorlikda ishlab chiqarish imkoniyatlari o‘rganyapmiz. Xususan, mahalliy sheriklar bilan birgalikda Tashkent Pharma Park hududida halol insulin ishlab chiqarish loyihasini amalga oshirish niyatimiz bor”, dedi u.
Dastlabki bosqichda mamlakatdagi farmatsevtika korxonalarining mavjud infratuzilmasidan foydalangan holda halol standartlari asosida dori vositalarini ishlab chiqarishni yo‘lga qo‘yish maqsadida Malayziyadan zarur texnologiyalarni olib kelish, keyingi bosqichda esa ushbu biznesga sarmoya kiritish rejalashtirilmoqda.
Ma‘lumot uchun, Pharmaniaga Berhad kompaniyasi 1994-yilda tashkil etilgan. Kompaniya Malayziyada farmatsevtika mahsulotlarini ishlab chiqarish bo‘yicha to‘rtta zavod, tadqiqot markazi, logistika kompaniyasi, shuningdek, sotish va marketing hamda tibbiy mahsulotlar va xizmatlarni yetkazib berish bo‘yicha 5 ta korxonaga egalik qiladi. Bundan tashqari, kompaniyaning Indoneziyada 3 ta korxonasi bor.
O‘zbekiston Malayziya bilan jinoiy ishlar bo‘yicha huquqiy hamkorlik qiladi.
Shavkat Mirziyoyev Malayziya bosh vaziri Anvar Ibrohimning taklifiga binoan 4-fevral kuni kechqurun rasmiy tashrif bilan ushbu mamlakatga borgandi. Prezident aeroportda Malayziya parlamenti spikeri bilan uchrashuv o‘tkazgan. Bo‘lajak oliy darajadagi uchrashuvlar kun tartibi yuzasidan fikr almashilgan.
Tashqi savdo
Yil boshidan buyon O‘zbekiston va Malayziya o‘rtasida tashqi savdo aylanmasi 36 foizga oshib, salkam 20 mln AQSH dollarini tashkil qildi. O‘zbekistondan Malayziyaga asosan meva-sabzavot, mineral o‘g‘itlar eksport qilingan bo‘lsa, ushbu davlatdan O‘zbekistonga o‘simlik yog‘ilari, qahva, choy va ziravorlar, kimyo sanoati va oziq-ovqat mahsulotlari import qilingan.
Dronlar ishlab chiqarishda hamkorlik
Kuni kecha O‘zbekiston va Malayziya aqlli qishloq xo‘jaligi texnologiyalari va dronlar ishlab chiqarishda amaliy hamkorlik qilishga kelishgan edi.
Malayziya kompaniyalari O‘zbekistonda dronlar ishlab chiqarishga qiziqish bildirayotgani haqida 2023-yilning aprelida ma’lum qilingandi. 2024-sentyabrida Malayziyaning yetakchi robototexnika yetkazib beruvchisi Meraque Group kompaniyasi va O‘zbekiston Qishloq xo‘jaligi vazirligi o‘rtasida o‘zaro anglashuv memorandumi imzolangandi.
Ushbu kompaniya kelgusi uch yil ichida O‘zbekistonda mingta ish o‘rni yaratadigan va 100 ming gektar qishloq xo‘jaligiga xizmat ko‘rsatadigan ishlab chiqarish korxonasini tashkil etish uchun 20 million Malayziya ringgiti sarmoya kiritmoqchi. Kompaniya, shuningdek, mintaqadagi texnologik takomillashtirish uchun qo‘shimcha 30 million ringgit yig‘moqchi.
2018-yilda tashkil topgan Meraque kompaniyasi keng turdagi dronlar va ular uchun dasturiy taʼminot ishlab chiqarish, robototexnikaga ixtisoslashgan. Kompaniya Vyetnam, Kambodja, Filippin, Laos va Pokistonda faoliyat yuritadi.
Izoh (0)