AQSH prezidenti Donald Tramp mamlakati Ukrainadagi urushni moliyalashtirish uchun pul bermasligini ma’lum qildi. Bu haqda UNIAN nashri xabar berdi.
Trampning so‘zlariga ko‘ra, urushning to‘xtamayotganiga shaxsiy kelishmovchiliklar sabab bo‘lmoqda. Biroq oxir-oqibat urush to‘xtatiladi. Shu bilan birga, u Ukraina uchun xavfsizlik kafolatlari tafsilotlari hali muhokama qilinmaganini ham ta’kidladi.
“Yevropa mamlakatlari ularga (Ukrainaga) sezilarli xavfsizlik kafolatlari berishga tayyor va ular buni qilishlari kerak. Chunki bu ularning qit’asi. Lekin biz ham bunda ishtirok etamiz — qo‘llab-quvvatlash nuqtayi nazaridan. Biz ularga yordam beramiz. Agar kelishuvga erishilsa, biz tinchlikni qo‘llab-quvvatlaymiz. Chunki men odamlar o‘limini to‘xtatishni xohlayman”, degan AQSH rahbari.
Shuningdek, u Bayden ma’muriyatining Ukrainaga bergan yordamiga to‘xtalib, bu miqdor 350 milliard dollarni tashkil etganini eslatdi.
“Men Zelenskiyni uchratganimdagi eng buyuk savdogar deb ataganman. Chunki u har safar boshqa mamlakatga kelganda 50 milliard dollar bilan qaytadi. Lekin biz endi Ukrainaga hech qanday pul bermaymiz. Aksincha, hammasi teskari: ular NATO orqali murojaat qilib, raketa so‘raydi. Biz NATOga raketa sotamiz. NATO bizga to‘laydi va ular raketalar bilan xohlaganini qiladi”, degan Tramp.
Tramp Rossiya prezidenti Vladimir Putinning Ukraina prezidenti Vladimir Zelenskiyni yoqtirmagani uchun u bilan uchrashmasligini ham aytib o‘tdi.
“Putin uni yoqtirmaydi. Uni yoqtirmaydi, tushunyapsizmi? Mening ham yoqtirmaydigan odamlarim bor. Ular bilan uchrashishni xohlamayman. Xo‘sh, ularni qanday qilib bir joyga yig‘ish mumkin? Ular haqiqatan ham bir-birini yoqtirmaydi”, degan Amerika yetakchisi.
U, shuningdek, “AQSHda soxta saylovlar orqali hokimiyatga kelgan rahbar emas, haqiqiy saylovlar orqali tanlangan prezident bo‘lganida, urush boshlanmagan bo‘lishini” ta’kidladi. Bu gaplari yana bir bor sobiq prezident Jo Baydenga qaratilgan edi.
“Putin aniq aytgan: agar Tramp prezident bo‘lganida, bu sodir bo‘lmagan bo‘lardi”. Bu ko‘plab sabablarga ko‘ra yuz berdi. Bu Afg‘onistondagi vaziyat tufayli ham ro‘y berdi. Putin Milli va boshqa barcha odamlarning qanchalik nochorligini ko‘rib, endi vaqt keldi, deb o‘ylagan. Ukraina esa doim uning uchun mazali bo‘lak bo‘lgan. Agar men prezident bo‘lganimda, bu hech qachon yuz bermagan bo‘lardi”, deya xulosa qilgan Donald Tramp.
Prezident Vladimir Zelenskiyning ma’lum qilishicha, Ukraina oyiga kamida 1 milliard dollarni ittifoqchilardan oladi. Bu mablag‘ Amerika ishlab chiqargan qurollarni xarid qilishga yo‘naltirilishi rejalashtirilgan.
Bu orada Germaniya moliya vaziri Lars Klingbayl Berlinning Ukrainaga yiliga 9 milliard yevro miqdorida yordam ajratishini bildirdi. Bu yordam kamida ikki yil davom etadi.
Izoh (0)