Prezident farmoniga muvofiq, 2025/2026-o‘quv yilidan oliy harbiy taʼlim muassasalarining namunali kursantlari va tinglovchilari uchun “Oliy bosh qo‘mondon” davlat stipendiyasi joriy etiladi. Bu haqda Adliya vazirligi xabar berdi.

O‘quvchilar o‘rtasida muhandislik-ixtirochilik yo‘nalishida olimpiadalar o‘tkazish yo‘lga qo‘yiladi. Bunda g‘olib bo‘lgan bitiruvchi yoshlar davlat oliy taʼlim muassasalarining olimpiada yo‘nalishiga mos va turdosh taʼlim yo‘nalishlariga imtihonlarsiz qo‘shimcha davlat granti asosida o‘qishga qabul qilinadi.
Bundan tashqari, yoshlarni ilmga qiziqtiruvchi, tarbiyaviy ahamiyatga ega va umummilliy qadriyatlarni shakllantirishga xizmat qiluvchi milliy mediakontentlar yaratish hamda eng yaxshi intellektual shoularni tashkil etish uchun 100 mln so‘mgacha grantlar ajratiladi.
Shuningdek, yoshlarda tabiatga muhabbat hissini uyg‘otish, atrof-muhitni muhofaza qilishga qaratilgan loyihalarni qo‘llab-quvvatlash uchun Yoshlar ishlari agentligi huzurida yuridik shaxs maqomiga ega bo‘lmagan “Yashil tashabbuslar”ni qo‘llab-quvvatlash jamg‘armasi tashkil etiladi. Mazkur jamg‘arma 10 mlrd so‘mgacha miqdorda shakllantiriladi.
2025-yildan “El-yurt umidi” jamg‘armasining yangi stipendiya yo‘nalishi sifatida “Yorqin isteʼdod” loyihasi joriy etilishi haqida xabar berilgandi.
Shuningdek, ushbu farmon bilan 2025-yil 1-maydan 2031-yil 1-yanvargacha kreativ park rezidentlariga soliq imtiyozlari joriy etiladi.
Izoh (0)