Rossiya Qora va Boltiq dengizlari ustidagi xalqaro suvlarda patrul qilayotgan fransuz harbiy samolyotlarini qasddan nishonga olganlikda ayblanmoqda.
Fransiya uning samolyotlariga Rossiya ataylab havo hujumidan mudofaa tizimlarini qaratganini ma’lum qildi. Fransiya mudofaa vaziri Sebastyan Lekornyu tizim Qora dengizdagi fransuz samolyotini nishonga olganini aytdi. Qurolli kuchlar polkovnigi Jan-Pyer Godile bunga aniqlik kiritib, voqea 2024-yil noyabr oyida yuz berganini ma’lum qildi.
Radioaloqa paytida rossiyaliklar bizga tahdid qildi. Muloqot juda tajovuzkor tarzda o‘tdi. Bunday holat ilgari hech qachon kuzatilmagan, dedi Godile.
AFP’ning ishonchli manbalariga ko‘ra, Rossiya tomoni ochiqchasiga fransuz samolyotini “yo‘q qilishi”ni aytgan. Xuddi shunday voqea 19-mart kuni Fransiya harbiy-dengiz kuchlarining Baltic Watch operatsiyasida ishtirok etayotgan Atlantique 2 patrul samolyoti bilan sodir bo‘lgan. Samolyot Boltiq dengizi ustidagi xalqaro havo hududida parvoz qilgan.
U Rossiyaning harakatlariga qaramay, yo‘nalishini o‘zgartirmagan va tahdidlarga e’tibor bermagan holda Boltiq dengizining suvosti infratuzilmasini kuzatish vazifasini bajarishda davom etgan.
Fransiya qurolli kuchlari bosh shtabi tushuntirishicha, Rossiya oddiy kuzatuv tizimlaridan farqlanadigan o‘t ochishni boshqarish radaridan foydalanmoqda. Oddiy radarlar havo bo‘shlig‘ini passiv ravishda kuzatsa, o‘t ochishni boshqarish radari nishonni faol ravishda kuzatib, ehtimoliy zarba uchun qurol tizimiga aniq ma’lumotlarni uzatadi.
Bunday maqsadli nishonga olish dushmanlik niyatidan dalolat beradi, chunki bu raketani uchirishdan oldingi so‘nggi bosqichdir, deya ta’kidladi Bosh shtab.
Bu fransuz samolyotlari nishonga olinganiga oid yagona hodisa emas
4-mart kuni Fransiya harbiy-havo kuchlari va kosmik kuchlarining MQ-9A Reaper droni Rossiyaning Su-35 qiruvchi samolyotining O‘rta yer dengizining sharqiy qismida tajovuzkor manyovrlariga duch keldi. O‘shanda Lekornyu Rossiya tomonining harakatlarini “ataylab qilingan, noprofessional va tajovuzkor” deb atagan. U Fransiya xalqaro hududlarda o‘z missiyalarini bajarishdan bosh tortmoqchi emasligini ta’kidlagan.
Yanvar oyida Fransiyaning Atlantique 2 samolyoti Kaliningradda joylashgan S-400 tizimi tomonidan nishonga olingan edi. Voqea NATO missiyasi doirasida xalqaro suvlar monitoringi olib borilayotgan paytda sodir bo‘lgan.
Lekornyuning aytishicha, Rossiya Sovuq urush davridagi Sovet ittifoqining xatti-harakatlarini eslatuvchi “o‘ta tajovuzkor” taktikaga qaytmoqda.
Rossiyaning 2024-yildagi xulq-atvori uning Ukrainaga qarshi tajovuzidan oldingi kuzatuvlarimizdan tubdan farqlanadi. Bu Rossiyaning jang maydonida duch kelayotgan qiyinchiliklari bilan izohlanadi, deb ta’kidladi vazir.
Fransiya harbiy-havo kuchlari mudofaani kuchaytirishga qaratilgan harbiy ittifoq strategiyasi doirasida NATOning sharqiy chegarasini muntazam ravishda nazorat qilishni davom ettirmoqda. 2022-yilda Rossiyaning Ukrainaga keng ko‘lamli bostirib kirishidan keyin, bunday vazifalar mintaqada xavfsizlikni ta’minlash uchun ustuvor ahamiyat kasb etdi.
Izoh (0)